Вазир ўринбосарига танбеҳ, тадбиркорга мақтов. Наманганга ташрифнинг биринчи куни

Вертолётда ташриф. Тежамкор тадбиркор мақтов эшитди

Биринчи кунга белгиланган объектлардан бири Наманганнинг Чуст туманида жойлашган тўқимачилик корхонаси бўлди. Бу манзилга президент вертолётда етиб борди. Биринчи рақамли вертолёт шу ҳудудда тайёрланган вертолёт майдончасига қўнди. «Chust textile» корхонаси пандемияга қарамай, ўтган йили 9 миллион долларлик маҳсулот экспорт қилган ва бу кўрсаткични 12 миллион долларга чиқариш кутилаётгани айтилди.

Корхона бинолари кўп материаллар сарфланмай, ангар усулида барпо этилган. «Chust textile» раҳбарининг айтишича, бу орқали 6 миллион доллар тежаб қолинган ва ўша пулга Туркиядан матони бўяшда ишчиларга қулайлик туғдирадиган янги технология олиб келинган. Маълум бўлишича, бундай техника сабаб ишчилар матони бўяш вақтида бўёқнинг зарарли ҳидидан нафас олмай ишлайди.

Тадбиркор қурилишнинг ўзида 6 миллион долларни иқтисод қилгани учун Шавкат Мирзиёевдан мақтов эшитди ва президент бошқа текстил корхоналарида ҳам мана шундай енгил металл конструкцияли бинолардан фойдаланиш бўйича кўрсатма берди.

«Асфальтни арзон қилиш учун нима қилиш керак?»

Ташриф давомида президент Наманган шаҳрида ташкил этилган Даштбоғ кичик иқтисодий зонасида бўлди. У ерда вилоятга оид қатор лойиҳалар бўйича тақдимотлар ўтказилди. Аввало ички йўллар масаласи муҳокама қилинди. Тақдимотда йўлларга тош ва қум аралашмаси (ШПС) тўшаш асфальтдан арзон тушиши ва кейинчалик унинг устига асфальт ётқизилса, яхши ёпишиши айтилди.

Шавкат Мирзиёев Автомобиль йўллари қўмитаси раиси Абдураҳмон Абдувалиевдан асфальтнинг таннархини арзонлаштириш учун нима қилиш мумкинлигини сўради. У эса асфальт ишлаб чиқариш учун асосий хомашё бўлган битумни импорт қилишда божхона тўловларида имтиёз берилса, таннарх тушишини айтди. Абдувалиевнинг айтишича, бундай имтиёз берилса, бир йилда бюджетга тушум 60 миллиард сўмга камаяди. Президент эса буни ўйлаб кўрса бўладиган масала деб айтди ва масъулларга Наманган вилоятининг таъмирланадиган йўллари бўйича харита тайёрлаш ва барча йўлларга жавоб берадиган одам тайинлаш бўйича топшириқ берди.

Президент Намангандаги йўлларни сифатли қилиш бўйича алоҳида гапирди. «Ажратилган пуллар манзилига етиб бормаса, ўғирланса, одамлар ҳақли равишда норози бўлади. Мен керак бўлса 500 миллиард ажратишга тайёрман, фақат йўл сифатли бўлсин», деди президент.

Вазир ўринбосари дакки эшитди

Кейинги масала Наманган вилоятини тоза ичимлик суви билан таъминлаш бўлди. Бу борада чиқиш қилган Уй-жой коммунал хизмат кўрсатиш вазирининг биринчи ўринбосари Соҳиб Саифназаров президентдан дакки эшитди. У Наманганни қандай қилиб сув билан таъминлаш бўйича лойиҳа тақдим этаётганда, президент савол берди: «Қурилишни ким қилади, қайси сув билан шуғулланувчи ташкилот?». Вазир ўринбосари саволга жавоб бера олмади ва бу борада фаолият юритувчи корхона йўқлиги соҳанинг асосий камчилиги эканини айтди. Президент эса Саифназаровни танқид қилди: «2022 йилгача Наманганни сув билан таъминлаймиз деяпсизлар, лекин наманганликлар бу гапни 1991 йилдан бери эшитади. Ахир бу борада махсус билимга эга мутахассислар керак, аниқ таклиф керак. Булар фақат тендер дейишни, пул дейишни билади, ичимлик суви билан таъминлашда тендер бўлмайди, маҳаллий кенгаш қарор қилади, тамом. Ахир бу билан махсус шуғулланадиган корхонанинг ўзи бўлмаса», деди Шавкат Мирзиёев.

Президент марказлашган иссиқлик таъминотида ҳам шундай муаммолар борлигини айтиб ўтди: «Бу ишда ҳам махсус билими бор одамлар керак. Архитектура бўйича ўқиётган, изланаётган одамларни топинглар, 15-20 миллион сўмдан маош беринглар, изланинглар. Мен ҳам атрофимда илмли вазирлар бўлишини хоҳлайман».

«Транспорт қишда совуқ, ёзда иссиқ...»

Президент Намангандаги жамоат транспорт муаммосини гапириш асносида улар эксплуатация қилинмаслигини танқид қилди: «Йўлларни-ку эксплуатация қиляпмиз, лекин транспортничи? Улар ёзда иссиқ, қишда совуқ».

«Ахсикент Самарқанднинг Регистони каби бўлиши керак»

Президент Ахсикент тарихий ҳудудида қурилажак сайёҳлик зонаси лойиҳасига алоҳида эътибор қаратди. У Регистон Самарқанд учун қанчалик бўлса, Ахсикент Наманган учун шундай бўлиши кераклигини айтди. Мирзиёев Ахсикентдаги янги лойиҳадан кўнгли тўлмади ва бино замонавий ҳаётни эмас, тарихни эслатиши кераклигини айтди: «Наманганнинг қаттиқ тошлари бор-ку, шулардан фойдаланинглар. Италиядаги Колизейга ўхшаган бўлсин. Албатта, ундай қуриш қийин, кичик бўлса ҳам, тарихни эслатсин, деворларда тарих гавдалансин. Бунақа асфальтланган жойлар билан одамларни ажаблантиролмайсиз, чунки Тошкентда ҳам, Наманган шаҳрида ҳам бунақа жойлар бор. Катта жой бўлмасин, кичик бўлсин, баҳаво бўлсин, ёшлар бемалол нафас олиб дам оладиган жой бўлсин. Уларга тарихимизни шундай қилиб ўргатайлик. Абдураззоқов, мана бу иш билан шуғулланиш керак. Бу бошқача иш», деди президент.

Шавкат Мирзиёев Ўзбекистонда Бобур музейи ташкил қилишни орзу қилишини айтди: «Мен Ўзбекистонда Бобур музейи бўлишини хоҳлайман. Биз Бобурни англашимиз керак, «Бобурнома»ни ўқиш керак. Ёшлигимизда «Манифест»ни (Карл Маркс ва Фридрих Энгельснинг асари)» ўқитишди, лекин «Бобурнома»да ундан кўп нарса бор. Навоий бобомизнинг ҳам музейи йўқ. Айтайлик, Хамсанинг бешта достонига мослаб музей қуриш мумкин. Шу вақтгача фақат Амир Темур бобомизнинг музейини қурдик».

Ташриф чоғидаги азон овози...

Шавкат Мирзиёев биринчи ташриф куни кечки вақтда Наманган шаҳридаги «Даштбоғ» маҳалласи хонадонларидан бирида меҳмон бўлди. Президент хонадонга ташриф буюриши билан яқин ўртадаги масжиддан азон овози эшитилди. Бошланишида гўёки шовқин азон овозини эшиттирмагандай бўлаётганди, лекин шу вақтда президент азон ҳақида сўз бошлади: «Мана, азон овози эшитиляпти, қанчалик қулоққа ёқади. Аввал бундай овозлар эшитилармиди? Рухсат йўқ дейишарди, кўп нарса мумкин эмасди. Мана имкони бор экан-ку, нимага мумкин эмаскан?», деди президент. Хонадон эгалари президентни «Ҳамма президентлар ортингиздан юрсин» деб дуо қилиб қолишди...

Ўткир Жалолхонов, Kun.uz мухбири