Байден аҳолини вакциналардан чўчимасликка чақирди

АҚШ президенти Жо Байден мамлакат аҳолисини эмланишдан чўчимасликка чақирди.

Байден Мичиган штатидаги вакциналар ишлаб чиқарилувчи Pfizer заводига ташрифи чоғида ана шундай мурожаат билан чиқди.

"Бутун мамлакатга мурожаат қилмоқчиман: вакциналар хавфсиз. Илтимос, ўзингиз, оилангиз, мамлакат учун, навбатингиз келганида вакцинадан фойдаланинг. Пандемияни фақат шу йўл билан енгишимиз мумкин", деди АҚШ президенти.

Ҳозирда АҚШда оғир об-ҳаво шароити боис эмлаш кампанияси қийинлашди. Деярли бутун мамлакат бўйлаб бир ҳафтадан буён кучли қор ёғиши давом этмоқда. Оқ уйнинг маълумот беришича, ноқулай об-ҳаво ва транспорт муаммоси сабабли уч миллион доза вакцина етказиб берилишини ортга сурган.

Pfizer — АҚШда фойдаланишга рухсат берилган икки вакцинадан бири. Декабрдан буён мамлакатда 30 миллион доза вакцина қўлланган.