Самарқандда фирибгарлик қилиб одамларнинг пулларини ўзлаштирган МЧЖ раҳбарларига жиноят иши қўзғатилди

Тошкент шаҳрида жойлашган «BITSIMPLEХ» масъулияти чекланган жамиятнинг Самарқанд филиали ходимлари фуқароларнинг  пулларига фоиз тўлаб, кўпайтириб беришини айтиб, уларнинг пулларини ўзлаштирган. Бу ҳақда ИИВ ҳузуридаги Тергов департаменти хабар бермоқда.

Қайд этилишича, Тошкент шаҳрида жойлашган «BITSIMPLEХ» МЧЖнинг Самарқанд филиали ходимлари 2019 йил октябрдан 2020 йил сентябргача, 1 йил мобайнида фуқароларнинг пулларини кўпайтириб беришларини айтиб, уларни ишонтириб, МЧЖнинг офисида одамлардан 500 дан 22 250 АҚШ долларигача бўлган пул маблағларини шартнома тузиб, инвестиция тариқасида қабул қилган.

Сўнг, 2020 йилнинг сентябр ойигача олган пулларидан, одамларга даромад тариқасида 2,5 фоиздан 4 фоизгача пул маблағларини бериб келган. Ундан кейин олган пулларини эгаларига қайтариб бермасдан келаётганлиги аниқланган.

Хабарда ёзилишича, алданиб қолган фуқароларнинг аризаларига асосан, Самарқанд шаҳри ИИО ФМБ ҳузуридаги тергов бўлими томонидан «BITSIMPLEХ» МЧЖ мансабдор шахсларига нисбатан Жиноят кодексининг 168-моддаси 4-қисми «а» банди билан жиноят иши қўзғатилган. Ҳозирда жабрланган фуқароларнинг жами сони ва уларга етказилган зарарни қоплашга қаратилган тергов ҳаракатлари олиб борилмоқда.