Жорий йилнинг 23 февраль куни Бекобод тумани ИИБ Жиноят қидирув бўлими ходимлари томонидан тезкор тадбир ўтказилган. Бу ҳақда Тошкент вилояти ИИББ ахборот хизмати хабар бермоқда.
Унинг давомида, Тошкент шаҳрида яшовчи, 1977 йилда туғилган (илгари Жиноят кодексининг 276-моддаси билан айбли деб топилган) Абдурашид Т. Бекобод тумани “Истиқбол” МФЙ ҳудудида тўхтатилиб, холислар иштирокида кўздан кечирилган.
Фуқарони кўздан кечириш давомида қўлида бўлган сумкасида скотч билан ўралган ҳолда тўқ яшил рангли, вазни 1 кг.га тенг “гашиш” гиёҳвандлик воситаси борлиги аниқланиб, ҳужжатлаштирилиб олинган.
Ўтказилган суҳбат давомида Абдурашид Т. “гашиш” гиёҳвандлик воситасини Тожикистондан чегара айланма йўллар орқали яширин тарзда олиб ўтганини ва уни Тошкент шаҳрига 200 миллион сўмга сотиш мақсадида олиб кетаётганини маълум қилган.
Ҳолат юзасидан ушланган шахсга нисбатан Бекобод тумани Ички ишлар бўлими ҳузуридаги Тергов бўлими томонидан ЖКнинг 273-моддаси 5-қисми билан жиноят иши қўзғатилган.
Ҳозирда ички ишлар бўлими ходимлари томонидан ушбу гиёҳвандлик воситаси манбасини аниқлаш мақсадида тезкор суриштирув ишлари олиб борилмоқда.
