Европа кенгаши раиси Россия ва Хитойни коронавирус вакцинаси ташвиқотида айблади

Европа Кенгаши раиси Шарль Мишель Россия ва Хитой ҳукуматларини коронавирус вакцинасидан пропаганда қуроли сифатида фойдаланаётганликда айблади. «Ҳар икки давлат ҳам бошқа давлатларга «ўта чекланган миқдорда» етказиб беряпти, бироқ бу ҳақда жамоатчиликка бонг уришмоқда», деган Мишель 9 март куни Брюсселда.

«Олинган маълумотларга кўра, бу давлатларда ҳар 100 кишига тўғри келадиган доза Европадан икки баробар камроқ. Европа вакцинадан пропаганда мақсадларида фойдаланмайди. Биз қадриятларимизни тарғиб қиламиз», дея таъкидлаган Еврокенгаш раҳбари.

Мишель вакцина давлатлар ўртасида тақсимланиши ҳақида гап кетганда, вакцинация соҳасидаги миллатчиликни инкор қилди. Шу билан бирга, сиёсатчи AstraZeneca билан можаро мобайнида Брюссель учинчи давлатларга вакцина экспортини назоратга олиш ҳимоя механизмини жорий қилганини тан олган. «Бироқ Евроиттифоқ вакцина экспортини тўхтатганича йўқ. Аммо Буюк Британия ва АҚШ вакцина экспортини бутунлай тақиқлаб қўйишди», дейди Мишель.

Буюк Британия эса унинг вакцина экспортига қўйилган тақиқ ҳақидаги сўзларини инкор қилди. «Британия ҳукумати ҳеч қайси коронавирус вакцинаси экспортини ҳеч қачон тақиқламаган», дейилган Даунинг стрит баёнотида.

Бир неча давлатлар Россия ва Хитой вакциналарини сотиб олишга шай

Европа Иттифоқининг бир неча давлатлари, жумладан, Венгрия, Чехия ва Словакия Евроиттифоққа ажратилган вакцина етишмовчилиги сабаб Россия ва Хитойдан препарат сотиб олишни режалаштиряпти. Россия ва Хитой вакциналари Брюссель тасдиғидан ўтмаган, лекин Евроиттифоқ давлатлари инқирозли вазиятда ўз давлатларидагина фойдаланиш учун препаратлардан фойдаланиши мумкин.  

Венгрия Хитойнинг Sinopharm компаниясига 5 миллион, Россиянинг «Спутник V» вакцинасига 2 миллион доза буюртма берган. Мамлакат бош вазири Виктор Орбан Хитойнинг Sinopharm вакцинаси билан эмланди. Чехия президенти Милош Земан Россия президенти Владимир Путинга вакцина етказиб беришни сўраб мурожаат қилган ва Путин рози бўлган. Словакияда эса, «Спутник V» вакцинасини харид қилиш мобайнида ҳукуматда инқироз содир бўляпти. Бош вазир Игор Матович коалициядаги ҳамкорларининг розилигисиз Россия билан вакцина етказиб бериш бўйича битим имзолаган.