Америкалик сенатор Пекин Олимпиадасини бойкот қилишга чақирди

Ромни америкалик спортчиларга Пекин Олимпиадасида иштирок этишни тақиқлаш Хитой ҳукуматига қарши курашда ёрдам бермаслиги мумкинлигини айтган. Шу сабабли у Хитойга иқтисодий ва дипломатик бойкот эълон қилиш учун америкалик томошабинларга Олимпиадага ташриф буюришни тақиқлашни ҳамда спорт тадбиридан парчаларни намойиш қилмасликни таклиф қилди.

Сенатор, шунингдек, Хитой Ҳонгконгга нисбатан сиёсати, уйғурларга зулм ўтказиши, мухолиф фикрларни билдиришга йўл бермаслиги учун Олимпиадани ўтказишга ҳақли эмаслигини айтган. Ромнининг таъкидлашича, ушбу бойкотга бошқа иттифоқдош давлатларни ҳам чақириш лозим.   

Аввалроқ Оқ уй матбуот котиби Жен Псаки АҚШ ўз терма жамоасининг Пекин Олимпиадасида иштирок этиши бўйича ҳали якуний қарор қабул қилмаганини айтган. Америкалик ҳуқуқ ҳимоячилари ва конгресснинг бир қатор аъзолари Хитойга уйғурлар геноциди бўйича айбловлар қўйилаётгани сабабли ҳукуматни Пекин Олимпиадасини бойкот қилишга чақирган.

Хитой ҳукумати ўз номига билдирилаётган бундай айбловларни рад этиб келмоқда ва мамлакатнинг ички ишларига аралашмасликка чақирмоқда.

Февралда Хитой ташқи ишлар вазирлиги вакили Ван Вэнбин Хитой спортнинг сиёсийлаштирилишига ва Пекин Олимпиадасини бойкот қилишга чақириқларга қарши эканини айтган. Дипломат бундай чақириқлар Олимпия хартияси тамойилларига зид эканини таъкидлаган.

Пекиндаги қишки Олимпиадани 2022 йил 4-20 феврал кунлари ўтказиш режалаштирилган. Аввалроқ Халқаро Олимпия қўмитаси президенти Томас Бах 2022 йилги Олимпиадага техник тайёргарлик аъло даражада эканини ва уни ўтказиш учун деярли барча нарса ҳозирланганини айтган.