Дам олиш кунлари ёмғир ёғиши кутилмоқда

Бугун Кавказ ҳудудларидан илиқ ва нам ҳаво массалари кириб келди, Ўзбекистоннинг аксарият ҳудудларида ёмғир ёғади, тоғолди ва тоғли ҳудудларда кучли бўлиши мумкин. Баъзи жойларда момақалдироқ бўлиши ва шамол 15-20 м/с гача кучайиши мумкин.

«Ўзгидромет» хабарига кўра, Қорақалпоғистонда, Хоразм, Бухоро, Навоий, Сурхондарё вилоятларида ёғингарчиликсиз об-ҳаво бўлиши кутилмоқда. Ҳаво ҳарорати 15-20 даража илиқ атрофида бўлади.

27 мартда республика ҳудудларида баъзи жойларда ёмғир ёғади, момақалдироқ бўлади, шамол 15-20 м/с гача кучаяди. Ҳаво ҳарорати кечаси 8-13 даража, кундузи 17-22 даража илиқ бўлади.

28 мартда Ўзбекистоннинг шимолий ҳудудларига, 29 мартда республиканинг барча ҳудудларига Кавказ ҳудудларидан нам ва совуқ ҳаво массалари кириб келиши кутилмоқда. Республика бўйича ёмғир ёғади, тоғолди ва тоғли ҳудудларда ёғингарчилик бўлади, баъзи жойларда кучли бўлиши мумкин. 28 мартда ёмғир момақалдироқ билан кузатилади, шамол 15-20 м/с гача кучаяди.

28-29 мартда Қорақалпоғистонда, Хоразм вилоятида, 29 мартда Бухоро, Навоий вилоятларида ёғингарчилик кутилмайди. 29 мартда ҳаво ҳарорати 6-11 даража илиққача пасаяди.

Ўзбекистоннинг тоғли ҳудудларида қор кўчиши хавфи сақланиб туради.

#об-ҳаво #Ўзгидромет