Абдулазиз Комилов Тожикистонга ташриф буюради

Ўзбекистон делегациясининг бўлажак «Осиё юраги – Истанбул жараёни» форумидаги иштироки тўғрисида расмий маълумот берилди.

2021 йилнинг 30 март куни Ўзбекистон ташқи ишлар вазири Абдулазиз Комилов бошчилигидаги делегация «Осиё юраги – Истанбул жараёни» мулоқотининг тўққизинчи вазирлар конференциясида иштирок этиш учун Душанбе шаҳрига (Тожикистон) ташриф буюради.

Ўзбекистон Ташқи ишлар вазирлиги хабарига кўра, форумда Афғонистондаги вазиятни барқарорлаштириш ва унинг ижтимоий-иқтисодий тикланишига ёрдам бериш мақсадида хавфсизликни таъминлаш ҳамда минтақавий иқтисодий ҳамкорликни янада ривожлантириш масаласи муҳокама қилинади.

Шунингдек, иштирокчи мамлакатлар ўртасида ўзаро ишончни мустаҳкамлаш чораларини кучайтириш масалалари кўриб чиқилиши режалаштирилган.