Туркияликларга Москвада “Спутник V” билан эмланиш таклиф қилинмоқда 

Туркияда Россиянинг коронавирусга қарши вакцинаси “Спутник V” билан эмланишни истовчилар учун Москвага сайёҳлик турлари сотилмоқда. Таъкидланишича, турнинг нархи 1099 еврони ташкил қилади.     

Hurriyet нашри журналисти Бурак Жўшаннинг маълум қилишича, кўплаб давлатларда вакцинага талаб таклифдан анча ошиб кетган ва шу сабабли уни олишга катта навбатлар юзага келган. Бироқ Россияда бундай ҳолат кузатилмаяпти.  

“Вакцина турлари”ни ташкиллаштирган компания вакили мижозлар Москвадаги шифохоналардан бирида муаммосиз эмлана олишларини маълум қилган.  

“Москва бўйлаб саёҳат, яшаш, парвоз ва эмлашни ўз ичига олувчи туримиз нархи 1099 еврони ташкил қилади. Эмланганларга бу ҳақида гувоҳнома берилади”, деб маълум қилинган компанияда.  

Тур Москвага икки марта сафар қилишни ўз ичига олади. Ҳар бир сафар 2 кун давом этади. Меҳмонлар Москвага келишлари биланоқ эмланадилар ва тунни 4 юлдузли меҳмонхонада ўтказадилар. Агар уларда эмлашдан кейин иккиламчи таъсирлар пайдо бўлса, тиббий ёрдам сўраб мурожаат қила оладилар. Тур нархига шаҳар бўйлаб экскурсия ва ёрдамчи хизмати ҳам киритилган. 

“Кремл, метрополитен, Нозим Ҳикмат (турк шоири) қабрига ташриф буюриш кўзда тутилган”, деб маълум қилинган туристик компанияда. 

Таъкидланишича, мижозлар эмланганлик ҳақида халқаро гувоҳнома олишади.  

Аввалроқ эмланиш мақсадида Россияга 20 кунлик сафарларни таклиф қилаётган компаниялар ташкил этилгани маълум қилинганди. Ушбу компаниялардан бирининг эгаси айтишича, бундай сафарларга талаб ошмоқда. Унинг таъкидлашича, бу тишни даволатиш учун Хорватиядаги стоматология шифохоналарига ёки Туркияда соч ўтказиш учун боришга ўхшашдир. Чунки бундай сафарлар истеъмолчи томонидан даволанишдек қабул қилинади.