Туркия Эрдўған номига номаъқул сўзлардан кейин Италиядан вертолётлар импортини тўхтатди

Расмий Анқара Италия бош вазири Марио Драги Туркия президенти Ражаб Тоййиб Эрдўған номига айтган номаъқул сўзлардан кейин Италиянинг «Leonardo» компаниясидан ўнлаб AW169 машғулот вертолётларини сотиб олишни тўхтатди. Аввалроқ Драги Еврокомиссия раиси Урсула фон дер Ляйенга Анқарадаги учрашувда курси берилмагани ортида Эрдўғанни «диктатор» деб атаганди.

Фото: La Repubblica

La Repubblica нашрининг хабар беришича, томонлар март ойида вертолётларни етказишга оид умумий қиймати 150 млн еврони ташкил қилувчи шартнома бўйича 70 млн евролик илк траншни ўтказишга келишиб олишган. Бироқ охирги воқеалардан кейин ушбу шартнома тақдири номаълум муддат мавҳум бўлиб қолади.

Шунингдек, Анқара яна учта компанияга шундай огоҳлантириш жўнатган.

Еврокомиссия раиси билан боғлиқ дипломатик можаро унинг Эрдўған билан учрашувидан кейин бошланди. Эрдўғаннинг Европа иттифоқи вакиллари — Еврокомиссия раиси Урсула фон дер Ляйен ва Еврокенгаш президенти Шарл Мишел билан учрашуви 7 апрелда Анқарада бўлиб ўтганди. Ўшанда учрашув ташкилотчилари музокара иштирокчиларига фақат икки курсини ҳозирлаб қўйишган. Улардан бирини Эрдўған, иккинчисини эса Еврокенгаш раҳбари Шарл Мишел эгаллаган. Натижада фон дер Ляйен протокол бўйича ўзидан пастроқ дипломатик даражани эгаллаган Мавлут Човушўғлу ўтирган диван қаршисидаги дивандан жой олишига тўғри келган.

Италия бош вазири можарога изоҳ бериб, Туркия президентини учрашувда ўзини номақбул тутишда айблаган ва уни «диктатор» деб атаган. Шундан кейин Туркия ташқи ишлар вазирлиги Италия элчисини чақиртириб, унга ўз норозилигини билдирган.