Путиннинг федерал мажлисга мурожаати олдидан депутат ва сенаторлар уч мартадан коронавирусга тест топширади

Парламент аъзолари 16, 19 ва 20 апрел кунлари тест топширишади.

Фото: Maxim Shemetov/Reuters

Россия президенти Владимир Путиннинг федерал мажлисга мурожаати олдидан депутат ва сенаторлар уч мартадан коронавирусга тест топширади. Бу ҳақда ўз манбасига таяниб «Известия» хабар берди.

Унинг сўзларига кўра, парламент аъзолари 16, 19 ва 20 апрел кунлари тест топширишади.

«Пандемия тарқалиши ва коронавируснинг учинчи тўлқини хавфи сақланиб турибди, шу боис юқори даражадаги эҳтиёт чораларига риоя қилишимиз шарт», — деди манба.

Аввалроқ Кремль матбуот хизмати мурожаатни ёритадиган журналистлар учун аккредитация бошланганини эълон қилганди. Тадбирга кириш учун 17 ва 20 апрел кунлари топширилган ПЗР-тестларнинг манфийлигини тасдиқловчи иккита маълумотнома тақдим этилиши лозим.

Россия президенти федерал мажлисга 21 апрелда мурожаат қилиши кўзда тутилган.