Литва Даниядан ишлатилмаган AstraZeneca вакцинасини беришни сўради

Литва ҳукумати AstraZeneca компаниясининг коронавирусга қарши вакцинасидан фойдаланишдан воз кечган Даниядан ушбу вакцинанинг ишлатилмаган қисми билан бўлишишни сўради. DELFI нашрининг хабар беришича, бу ҳақда Литва бош вазири Игрида Шимоните маълум қилди.

 «Биз кеча Данияга мурожаат қилиб, агар у вакцинанинг ишлатилмаган қисми билан бўлишса, уни мамнуният билан қабул қилишимизни билдирдик», деб айтган Шимоните.

Литва бош вазирининг таъкидлашича, ҳозирча Дания ишлатилмаган вакцинани қандай бўлишмоқчилиги ва Литва унинг қандай қисмига даъвогарлик қилиши мумкинлиги ноаниқ. У Литвада ушбу вакцина билан эмланишни истовчилар бўлишига шубҳа қилмаслигини айтган.

DELFI’нинг ёзишича, аввалроқ Латвия ҳам Данияга шундай мурожаат билан чиққан.

14 апрелда Дания AstraZeneca вакцинасидан фойдаланишдан бутунлай воз кечган биринчи мамлакат бўлгани маълум қилинганди. Ушбу қарор мазкур вакцина билан эмланганларда тромблар ҳосил бўлиши ҳолатлари билан изоҳланмоқда. Данияда ушбу вакцинанинг биринчи дозасини олган 149 минг кишига кейинроқ янги вакцина таклиф этилади. Таъкидланишича, Дания ҳаммаси бўлиб ушбу вакцинадан 2 млн доза олган.