Чехиядан барча россиялик дипломатлар чиқариб юборилиши мумкинлиги айтилди

Чехия ташқи ишлар вазири Ян Гамачек Прагадан барча россиялик дипломатлар чиқариб юборилиши мумкинлигини айтди. Унинг таъкидлашича, у Прага ва Москва ўртасидаги муносабатларни «нолдан бошлашга ҳам тайёр».

Ян Гамачек / Фото: DPA

Гамачек Facebook’даги саҳифасида Прагадан 18 нафар россиялик дипломат чиқариб юборилишига жавобан Москва 20 нафар чехиялик дипломатни чиқариб юборишини кутмаганини айтган.

«Мен Россия томонидан бошқача жавоб кутгандим. Мен барчасига тайёрман. Ҳаттоки муносабатларни нолдан бошлашга ҳам. Бу ҳолатда уларнинг барчасини (дипломатларни) уйларига қайтариб юборамиз», деб ёзган Гамачек.

Аввалроқ Чехия ташқи ишлар вазири Москвадаги элчихонада бор-йўғи 5 кишигина қолгани сабабли унинг иши деярли «фалажланганини» маълум қилганди. Шу сабабли Прага Европа иттифоқининг бошқа давлатларидан элчихона фаолиятига ёрдам беришларини сўраган.

Россия ва Чехия ўртасидаги зиддият Прага 18 россиялик дипломатни чиқариб юборишга қарор қилгандан кейин юзага келди. Чехия Россия элчихонаси ходимларини махсус хизматларга ишлашда ҳамда 2014 йилда Чехиянинг Врбетице қишлоғида жойлашган ўқ-дори омборларидаги портлашларга алоқадорликда айблаган.

Чехия бош вазири Андрей Бабиш Россия айбини тан олиши ва компенсация тўлаши кераклигини айтган.

Расмий Москва эса барча айбловларни рад этган ва жавоб чораси сифатида Россиядан 20 нафар чехиялик дипломат чиқариб юборилишини эълон қилган. Шунингдек, Чехия элчихонасига Россия фуқароларини ишга ёллаш тақиқлаб қўйилди.

Прагада чехиялик дипломатларнинг чиқариб юборилиши адолатсиз деб топилиб, бунга жавобан Россиянинг «Росатом» давлат корпорациясини Чехиядаги «Дуковани» атом электр станциясининг янги энергия блоки қурилиши бўйича тендерда қатнашувчилар рўйхатидан чиқариб ташлашга қарор қилинди.