Кремль Зеленский билан Қрим мавзуси муҳокама қилинмаслигини билдирди

Россия президенти Владимир Путин Украина президенти Владимир Зеленский билан икки томонлама муносабатларни муҳокама қилиши мумкин, аммо Қрим мавзусини эмас.

Бу ҳақда Россия президенти матбуот котиби Дмитрий Песков маълум қилди.

"Президентнинг ўзи икки томонлама муносабатлар тўғрисида гаплашиш мумкинлигини, Қрим мавзуси йўқлигини айтди. Шунинг учун буни муҳокама қилишнинг ҳожати йўқ", - деди Песков.

Аввалроқ Россия президенти Владимир Путин Украина президенти Владимир Зеленскийни Москвада қабул қилишга тайёрлигини айтганди.

 «Бу учрашувда нималарни муҳокама қиламиз? Агар бу Донбасс билан боғлиқ бўлса, у ҳолда Украина ҳукумати «ДХР» ва «ЛХР» раҳбарияти билан учрашиши, сўнгра бу муаммоларни учинчи мамлакатлар, жумладан, Россия билан муҳокама қилиши керак. Агар гап икки томонлама муносабатлар тўғрисида бўлса, у ҳолда марҳамат, биз Украина президентини Москвада унга қулай бўлган исталган вақтда қабул қилишга тайёрмиз», – деди у Беларусь президенти Александр Лукашенко билан учрашув чоғида.