АҚШдаги шаҳар Трампнинг қарздорлигини ундириш учун қарз ундирувчиларни ёллади

АҚШнинг Албукерке шаҳри собиқ президент Доналд Трампнинг қарздорлигини ундириш учун коллекторлик агентлигига мурожаат қилди, деб хабар берди Daily Mail.

Нашрнинг ёзишича, собиқ давлат раҳбари 2019 йил 16 сентябрда шаҳарда митинг ўтказганидан сўнг 211 минг доллар қарз бўлиб қолган. Маҳаллий ҳокимиятнинг фикрича, бу сумма хавфсизликни таъминлаш билан боғлиқ сарф-харажатларга компенсация сифатида тўланиши лозим.

Шаҳар мэри Тим Келлер Трамп аслида бундан ҳам кўпроқ қарздор деган фикрда: унинг сўзларига кўра, "шаҳар бир ярим кунга яқин вақт ўзига кела олмаган".

Қайд этилишича, қарздорликни сўндириш бўйича бир неча марта юборилган сўровлар натижасиз бўлган.

Трамп Албукеркеда митинг ўтказган куни мэрия ва шаҳарнинг бир қисми ёпилган, давлат хизматчилари шу куни ишламаган ва уларга ҳақ тўланган. Бундан ташқари, полиция ортиқча юклама билан ишлаган.

Маълумотларга кўра, бу Трампнинг митинг ўтказганлик учун қарзини тўламагани билан боғлиқ биринчи ҳолат эмас. Хусусан, Миннеаполис ҳокимияти собиқ президент 2019 йил октябрда шаҳарда митинг ўтказгани учун 543 минг доллар, Тусон шаҳри эса 2016 йил мартдаги митинг учун 82 минг доллар қарздор эканлигини билдирган.