Қирғизистон ва Тожикистон қўшинларни чегарадан узоқроққа олиб кетишга келишиб олди

Қирғизистон ва Тожикистон кун давомида қўшинларни чегарадан узоқроққа олиб кетишга келишиб олди

Бу ҳақда Қирғизистон давлат миллий хавфсизлик қўмитаси бошлиғи Қамчибек Тошиев маълум қилди, деб хабар бермоқда 24.kg.

"Тошиев бугун барча қўшинлар чегара чизиғидан олиб кетилишини айтди", - дейилади хабарда.

 Тошиевнинг сўзларига кўра, икки давлат чегарасидаги вазият 30 апрел оқшомига қадар тўлиқ барқарорлашади. У шунингдек, қирғиз-тожик чегарасини демаркация ва делимитация қилиш ишлари тез вақт ичида якунланишига умид билдирган.

Эслатиб ўтамиз, 29 апрелда чегарада юз берган можаро икки давлат ҳарбийларининг оғир қурол қўлланган ҳолдаги тўқнашувларига айланиб кетди. Икки томон ўртасидаги можарога сув тақсимлаш билан боғлиқ баҳс сабаб бўлган.

Охирги маълумотларга кўра, қирғиз-тожик чегарасида юз берган тўқнашувлар вақтида Қирғизистоннинг 13 фуқароси ҳалок бўлди, 134 нафари жароҳат олди.  

Тожикистон можаро вақтида ўз томонидан неча киши яралангани ва ҳалок бўлгани бўйича ҳали охирги маълумотларни келтирмаган. 29 апрелда Тожикистоннинг 3 фуқароси ҳалок бўлгани, 31 нафари жароҳатлангани маълум қилинганди.