Volkswagen номини ўзгартириши тўғрисидаги ҳазил хабар сабабли компанияга нисбатан текширув ўтказилади

Қимматли қоғозлар ва биржалар бўйича комиссия (SEC) Volkswagen автоконцернининг Америкадаги бўлинмаси ўз номини Voltswagen деб ўзгартириши тўғрисидаги хабар компания акциялари нархида ўзгариш қилиш учун тарқатилган деган фикрда текширув бошлади. Бу ҳақда Der Spiegel хабар бермоқда.

 Ном ўзгариши тўғрисидаги хабар экологик пиар-акция бўлганлиги билан изоҳланган. Аммо регуляторлар компаниядан мазкур реклама кампаниясини асослаб беришини сўрамоқда, чунки инвесторларнинг бир қисми ребрендинг ўтказилишига ишонган, бу эса биржа котировкаларида ўзгаришларга сабаб бўлган.

 Хабардан сўнг компания акцияларининг нархи 4,7 фоизга ошган. Агар комиссиянинг тахмини тасдиқланса, компанияга жиддий жарима солиниши мумкин.

29 март куни Volkswagen автоконцернининг Америкадаги бўлинмаси Volkswagen of America компанияси май ойида ўз номини Voltswagen of America деб ўзгартириши хабар қилинганди. Янги ном электр кучланишининг ўлчов бирлигини ифодаловчи «вольт» сўзидан олинган бўлиб, компаниянинг электромобиллар ишлаб чиқаришга эътибор қаратганини билдириши айтилганди. Кейинроқ хабар ўчириб ташланган ва Volkswagen Group of America раҳбари Скотт Кеог узр сўраган.