Еврокомиссия коронавирусга қарши эмланган хорижликларга ЕИга киришга рухсат беришни таклиф қилди

Улар ЕИда рухсат берилган вакциналардан бири билан эмланган бўлиши лозим. Ҳозирда Евроиттифоқда AstraZeneca, Pfizer/BioNTech, Moderna ва Johnson & Johnson вакциналари рўйхатдан ўтказилган.

Еврокомиссия (ЕК) коронавирусга қарши эмланган хориж фуқароларига Евроиттифоқ ҳудудига киришга рухсат беришни таклиф қилди. Бу ҳақда ЕК баёнотида айтилмоқда.

Бунда улар ЕИда рухсат берилган вакциналардан бири билан эмланган бўлиши лозим. Ҳозирда Евроиттифоқда AstraZeneca, Pfizer/BioNTech, Moderna ва Johnson & Johnson вакциналари рўйхатдан ўтказилган. «Спутник V» вакцинаси экспертизадан ўтказилмоқда.

Баёнотда айтилишича, хориж фуқаролари ЕИга келишидан камида икки ҳафта олдин коронавирусга қарши вакцинанинг ҳар икки дозасини олган бўлишлари лозим.

Ташриф буюрувчилар эмланганлигини рақамли сертификат орқали тасдиқлаш имкониятига эга бўлишлари талаб этилади.

Бундан ташқари, Еврокомиссиянинг қайд этишича, эпидемиологик вазият яхшилангани туфайли Таиланд, Австралия, Янги Зеландия, Сингапур, Руанда, Жанубий Корея ва Хитой фуқаролари эмланганлик мақомидан қатъи назар, Евроиттифоқ ҳудудига киришлари мумкин.