Зеленский Орбаннинг манзилини Украина қуролли кучларига бериш билан таҳдид қилди

Украина президенти Володимир Зеленский агар «Евроиттифоқдаги бир киши» Киевга Европа ёрдамини тўсишда давом этса, унинг манзилини Украина қуролли кучларига бериши ҳақида айтди. Зеленский нутқининг видеоси 5 март, пайшанба куни Telegram’да жойланди.

Зеленский Венгрия бош вазири Виктор Орбаннинг исмини тўғридан тўғри тилга олмади. Унинг исми агентликнинг кириш қисмида келтирилган. «Евроиттифоқдаги бир киши 90 миллиардни ёки 90 миллиарднинг биринчи траншини тўсмайди, деб умид қиламиз, шунда украин ҳарбийларида қурол бўлади. Акс ҳолда — бу одамнинг манзилини қуролли кучларимизга берамиз, улар унга қўнғироқ қилиб, у билан ўз тилида гаплашсин», — дейди Украина етакчиси. «Биз бу пулларга муқобил йўқлигини тушуняпмиз», — дея қўшимча қилади у.

Володимир Зеленскийнинг сўзларига кўра, Украина Брюссел кутаётган техник ечимлар тайёр бўладиган санани Европа Иттифоқига аллақачон айтган. Бу масала 19 март куни бўлиб ўтадиган Европа кенгаши йиғилишида кўриб чиқилиши керак. Агентлик ёзишича, Киев ижобий қарорга умид қилмоқда.

Венгрия 20 февралдан буён Украина учун Европа Иттифоқи ёрдамини тўсиб келмоқда. Гап 90 миллиард евро миқдоридаги кредит ҳақида кетмоқда, шундан 60 миллиард евроси бевосита Украинанинг мудофаа эҳтиёжлари учун мўлжалланган. Германия ташқи ишлар вазири Йоханн Вадефулнинг айтишича, бу кредитга нафақат Киевнинг мудофаа қобилияти, балки Европадаги тинчлик ҳам боғлиқ.

Венгрия ўз ветосини шундай изоҳламоқда: Украина ҳудуди орқали ўтадиган “Дружба” нефт қувурига Россия зарбасидан кейин у энди Россия нефтини олмаяпти, чунки Киев гўёки таъмирлаш ишларини амалга оширмаяпти. Володимир Зеленский ўтган ҳафта Будапешт танқидига жавобан, Россия нефтининг Европа бозорида ўрни йўқлигини айтган эди.

Венгрия ташқи ишлар вазири Петер Сийяртонинг сўзларига кўра, Будапешт «Венгрияга “Дружба” қувури орқали нефт транзити қайта тикланмагунча» ўз позициясини ўзгартирмайди.