ЖССТ коронавирус пандемиясининг иккинчи йили янада ҳалокатли бўлиши мумкинлигидан хавотирланмоқда

ЖССТ раҳбарининг сўзларига кўра, Шимолий ва Жанубий Америкада касалланиш ва ўлим ҳолатлари камайган. Осиё, айниқса Ҳиндистонда эса аксинча, кучли ўсиш кузатилмоқда.

Фото: EPA-EFE/RAJAT GUPTA

Жаҳон соғлиқни сақлаш ташкилоти (ЖССТ) бош директори Тедрос Аданом Гебрейесус COVID-19 пандемиясининг иккинчи йили биринчи йилга нисбатан янада кўпроқ ўлимларга сабабчи бўлиши мумкинлигини айтди.

«COVID-19 3,3 миллиондан ортиқ ўлимга олиб келди ва биз пандемиянинг иккинчи йили биринчи йилга нисбатан янада ҳалокатли бўлиши мумкинлиги йўлида турибмиз», — деди у.

Аввалроқ Гебрейесус дунёда коронавирус юқтириш ва ўлим ҳолатлари текис чизиққа тушганини айтганди. Унинг сўзларига кўра, Шимолий ва Жанубий Америкада касалланиш ва ўлим ҳолатлари камайган. Осиё, айниқса Ҳиндистонда эса аксинча, кучли ўсиш кузатилмоқда.

Апрел охирларида ЖССТ Ҳиндистон дуч келган вазият ҳар қандай давлатда кузатилиши мумкинлигидан огоҳлантирганди.

Тайёрлаган Дилшод Аскаров

#ЖССТ #коронавирус

2019 йилнинг декабрь ойи охирида Хитойнинг Ухань шаҳрида номаълум вирус тарқала бошлади. Бу вирус ҳаво орқали одамдан одамга юқади ва ўлимга олиб келади.