ЖССТ раҳбари янги хавфли вирус пайдо бўлиши мумкинлигини айтди

Дунёда янги ҳалокатли вирус пайдо бўлиши мумкин. Бу ҳақда Жаҳон соғлиқни сақлаш ташкилоти бош директори (ЖССТ) Тедрос Аданом Гебрейесус Женевада очилган 74-жаҳон соғлиқни сақлаш ассамблеясида айтди.  

 "Дунё пандемия хавфига охирги марта дуч келгани йўқ. Эволюцион ҳисоб-китобларга кўра, ҳозирги вирусдан ҳам юқумлироқ ва ҳалокатлироқ янги вирус пайдо бўлади", - деди у.

Гебрейесуснинг таъкидлашича, "пандемиянинг асосий драйвери" халқаро ҳамкорлик ва маълумотлар алмашиш истаги йўқлиги, ресурс ва технологиялар тақдим этилмаслигидир.

Унинг сўзларига кўра, "агар эски йўлдан борилса, ўша натижага – тайёр бўлмаган, хавфли ва адолатсиз дунёга етиб бориш мумкин".

ЖССТнинг маълумот беришича, 23 май ҳолатига дунё бўйича коронавирус юқтирганлар сони 166 млн 346 минг нафардан ошган, 3 млн 449 мингдан ортиқ киши вафот этган.

74-жаҳон соғлиқни сақлаш ассамблеяси 24 майдан 1 июнгача бўлиб ўтади. Унда асосий эътибор пандемияга қарши кураш ва янги фавқулодда вазиятларнинг олдини олишга қаратилади.