12:59 / 25.05.2021
3580

Агробанк: Россельхозбанк билан ҳамкорлик алоқалари ривожлантирилмоқда

Ўзбекистон Республикаси ва Россиянинг қишлоқ хўжалигини молиялаштирувчи йирик банклари “Aгробанк” АТБ ва “Россельхозбанк” АЖ ўртасида яқин ҳамкорлик алоқалари ривожланмоқда.

Хусусан, мазкур банк масъуллари иштирокида “Фермерлар мактаби”, “Рақамли экотизим” ва “Aгросаноат мажмуасининг экспорт қилишини қўллаб-қувватлаш” йўналишлари бўйича тажриба алмашишга қаратилган масофадан туркум тадбирлар ўтказилди.

Алоқаларни янада чуқурлаштириш мақсадида Aгробанк ва Россельхозбанк ўртасида банклараро ҳамкорликни ривожлантиришни назарда тутувчи меморандум имзоланди.

Меморандум 2021 йил 21 май куни Москва шаҳрида “Россельхозбанк” АЖ бошқаруви раисининг биринчи ўринбосари Кирилл Левин ва “Aгробанк” АТБ бошқарув раиси ўринбосари Эркин Кахоров томонидан имзоланди.

Шунингдек, музокаралар давомида инвестиция лойиҳаларини молиялаштириш, экспорт ва импортни қўллаб-қувватлаш, қишлоқ хўжалигига банк хизматлари кўрсатишда замонавий экотизимларни татбиқ этиш бўйича жорий имкониятлар ва ўзаро ҳамкорликда амалга ошириладиган истиқболли йўналишлар атрофлича кўриб чиқилди.

Томонлар замонавий технологиялардан фойдаланган ҳолда мижозларга хизмат кўрсатиш, ташқи савдони молиялаштириш, Россия ва Ўзбекистон резидентлари ўртасида пул ўтказмалари ва операциялар, NTPRo савдо майдончаси доирасида конверцион операцияларини амалга ошириш учун корреспондентлик алоқалари ўрнатилганлигини мамнуният билан қабул қилишди.

“Агробанк” АТБ Матбуот хизмати

Top