Жанубий Корея Ким Чен Ин бир ойга яқин вақтдан бери кўриниш бермаётганини маълум қилди

Шимолий Корея етакчиси Ким Чен Ин 24 кундан бери омма олдида кўриниш бермаяпти. Таъкидланишича, бу унинг жорий йил бошидан буён узоқ вақтга кўздан ғойиб бўлишидир. Бу ҳақда Жанубий Кореянинг Кореяларни бирлаштириш вазирлиги вакили Ли Чжон Жуга таяниб «Рёнхап» ахборот агентлиги хабар берди.

Вазирлик вакили бунинг сабабини билмаслигини ва ҳозир бу ҳолат юзасидан изоҳ беришнинг мавриди эмаслигини айтган.

Аввалроқ жанубий кореялик экспертлар Ким Чен Ин коронавирус юқтириб олишдан хавотирланиб, жорий йилда оммавий тадбирларга камроқ ташриф буюраётгани ҳақидаги тахминни илгари суришган.

2020 йил баҳорида ҳам Шимолий Корея етакчисининг муайян вақтга кўздан ғойиб бўлиши унинг жиддий касалликка учрагани ва ҳаттоки ўлгани ҳақида миш-мишлар тарқалишига олиб келган. Бироқ у 20 кун ўтиб, 2 май куни Сунчхондаги ўғитлар ишлаб чиқариш заводи очилишида иштирок этиб, бундай гапларнинг «болалаши»га чек қўйганди.