Японияга илк олимпиячилар етиб келди

Софтбол бўйича Австралия аёллар терма жамоаси Токио Олимпиадаси олдидан йиғин ўтказиш учун Японияга етиб келди. Улар Кунчиқар мамлакатга келган илк олимпиячилар бўлди.

Kyodo ахборот агентлигининг хабар беришича, терма жамоа самолёти Нарита халқаро аэропортига қўнган. 30 кишидан иборат жамоанинг барча аъзолари коронавирусга қарши эмланган. Улар меҳмонхонада 3 кун ўтказгач, 5 июндан машғулотларни бошлашади. Австралиялик спортчилар базаси Гумма префектурасининг Ота шаҳрида жойлашган. Терма жамоа бу ерда Ўйинларга тайёргарлик доирасида 12та учрашув ўтказади.

Апрелда Токио Олимпиадаси ташкилотчилари спортчилар ва улар билан алоқада бўладиган кишилар ҳар кун коронавирусга тест топширишлари ҳақидаги келишувга эришганди. Олимпиаданинг қолган иштирокчилари эса Японияга келгандан кейин 3 кун давомида ҳар кун тест топширади. Сўнгра тестлар ўтказилиши даврийлиги вазиятга қараб белгиланади.

2020 йилда ўтиши керак бўлган Токио Олимпиадаси пандемия сабабли 2021 йилга кўчирилганди. Ўйинлар 23 июлда бошланиб, 8 августга қадар давом этади. 20 март куни Олимпиада ташкилотчилари Ўйинлар хорижий мухлисларсиз ўтишига қарор қилганди. Япониялик мухлисларнинг Олимпиадага қўйилиши эса мамлакатда коронавирус билан боғлиқ вазиятдан келиб чиқиб июн ойида қабул қилиниши режалаштирилган.