Тошкентда ижарага хонадон изловчиларнинг пулларини ўзлаштирган жиноий гуруҳ қўлга олинди

Ўзбекистон Республикаси Ички ишлар вазирлиги Киберхавфсизлик маркази томонидан ўтказилган тезкор-қидирув тадбирлари давомида, бир неча йилдан буён юқорида кўрсатилган жиноий ҳаракатларни амалга ошириб келаётган жиноий гуруҳ фаолиятига чек қўйилди. Бу ҳақда ИИВ Киберхавфсизлик маркази хабар бермоқда.

Қайд этилишича, 2021 йилнинг 1 июн куни фуқаро А.А.Х. ўз жиноий фаолиятини давом эттираётган пайтда ушланиб, унинг ёнидан бир дона совуқ қурол, жабрдийда фуқаролардан ўғирланган банк пластик карталари ва мобил алоқа компанияларининг бир нечта сим карталари ашёвий далил сифатида олинган.

Аниқланишича, фуқаро А.А.Х. интернетдаги эълонлар сайти орқали пойтахт марказида жойлашган хонадонлардан бирини ижарага бераман, деб эълон жойлаштирган. Арзон нархдаги барча қулайликларга эга бўлган хонадон вилоятлардан келган ижарада яшовчиларнинг эътиборини ўзига қаратган.

Унга телефон орқали алоқага чиққан фуқароларга ўзини ҳарбий хизматчи деб таништириб, ҳозирда бошқа вилоятда эканини ва хизмат сафаридан 2-3 кунда пойтахтга қайтгач, ижарага олувчига хонадонни кўрсатишини, бошқа одамга ижарага бермаслик учун эса олдиндан пластик картасига пул ўтказиб бериши кераклигини айтган.
 
Шу тариқа, фуқаро А.А.Х. ўзига тегишли бўлмаган бир нечта пластик карталарга пул маблағларини ўтказиб олган заҳоти мижозлар билан алоқани узган. 

Фуқаро А.А.Х. ушбу услуб билан пойтахтда ижарага хонадон олмоқчи бўлган 100 нафардан ортиқ фуқаронинг ҳар биридан 200 минг сўмдан 2 млн сўмгача, бир йил давомида жами 80 млн сўмдан ортиқ миқдордаги маблағини ноқонуний йўллар билан талон-торож қилган.

Ҳозирда фуқаро А.А.Х. қўлга олиниб, унга нисбатан тегиши эҳтиёт чораси қўлланилган, шунингдек фуқаро А.А.Х.нинг жиноий шерикларини аниқлаш юзасидан суриштирув ва тергов ҳаракатлари давом эттирилмоқда.