Йирик инвесторларга тўғридан тўғри ер ажратиш давом этади. Адлия вазири изоҳ берди

Ер муносабатларига оид президент фармони билан, ҳокимларнинг тадбиркорларга тўғридан тўғри ер ажратиш ваколати бекор қилинаётган бўлса-да, бундай ҳуқуқ ҳукуматда сақлаб қолинди.

Унга кўра, Вазирлар Маҳкамаси тўртта ҳолатда истисно тариқасида ерларни тўғридан тўғри ажратиб бериши мумкин. Шулардан бири – камида 10 млн доллар сармоя киритадиган инвесторларга ерлар танловсиз тақдим этилади.

Нима учун танлов орқали эмас? Ижтимоий тармоқларда ушбу саволни берган айрим фойдаланувчилар мазкур банд олигархлар учун «лазейка» эканидан хавотир билдирди.

Мазкур масаладаги саволга 9 июн куни шу фармон юзасидан бўлиб ўтган матбуот анжуманида адлия вазири Русланбек Давлетов жавоб берди.

Вазирнинг айтишича, йирик инвесторларга ерлар тўғридан тўғри эмас, энг яхши таклифни танлаб олиш – «swiss challenge» орқали ажратилади.

«Бу ерда тўғридан тўғри демаяпмиз, энг яхши таклифларни танлаб олиш – «swiss challenge» дедик. Яъни хорижий инвестор келиб ўзини таклифини айтадиган бўлса, албатта, буни ҳаммага эълон қилиб, маълум вақт берилади. Ўша инвестордан кўра юқорироқ [яхшироқ] таклиф берилса, ўшаларга ер ажратилиши керак. Биз бу нарсани кўзда тутганмиз, бу низомларда ҳам ёзилади.

Хорижий инвестор аслида ўзбекистонлик бирор кимнинг қариндоши бўлиб чиқиши масаласида, бу – коррупцияга қарши ва ноқонуний орттирилган бойликларни легализация қилишга қарши курашиш доирасида амалга оширилади. Келаётган инвесторни очиқ реестрлар орқали муассисини кўрадиган бўлсак, у ерда яна битта юридик шахс ёзилади. У бошқа давлатдаги юридик шахс бўлади. Яъни, бу ерда унинг орқасида бевосита турган шахс кимлигини аниқлаш осон эмас. Шундай бўлса-да, бундай вазиятда ноқонуний бойликларни легаллаштиришга қарши қонунларимиз ишлаши керак.

Чет элдан келаётган инвестор бизга лойиҳа билан келади. Нега Вазирлар Маҳкамасида тўғридан тўғри ер ажратиш ҳуқуқи қолди, деяпсиз. Бутун дунёда ҳукумат нафақат ерни, балки давлат мулкини ҳам тасарруф қилади. Давлат мулки – ерга қараганда ҳам кўпроқ ва каттароқ бойлик. Давлат мулкини тасарруф этаётган ҳукуматга ишонмайдиган бўлсангиз… Ҳукумат, биринчидан, Олий Мажлис орқали шаклланади, раҳбари бевосита палаталар томонидан сайланади, бунинг учун овоз берилади.

Бундан ташқари, бу ишлар очиқ-шаффоф регламент асосида бўлади, деяпмиз. Лойиҳа Вазирлар Маҳкамасига киритилишидан олдин вазирликлар кўриши керак. Жамоатчилик муҳокамасига қўйилиши керак. Мана шундай шаффофлик стандартларига бу ерда амал қилиниши керак», – дея Русланбек Давлетовнинг сўзларини келтирмоқда Kun.uz мухбири.

Президент фармонига асосан, Вазирлар Маҳкамасига 2 ой муддатда Йирик инвестиция лойиҳаларини амалга ошириш учун энг яхши таклифни танлаб олишнинг маъмурий регламентини тасдиқлаш вазифаси юклатилган.