Шавкат Мирзиёев: Хорижий инвесторларга тенг ва адолатли шароит яратиш устувор вазифа

Президент Шавкат Мирзиёев раислигида Хорижий инвесторлар кенгашининг навбатдаги йиғилиши ўтказиляпти. Унда мамлакатда инвестиция муҳитини янада яхшилаш, инвесторлар ҳуқуқларини ҳимоя қилиш ва халқаро мажбуриятларни кенгайтириш масалалари муҳокама қилинмоқда.

Фото: Президент матбуот хизмати

Давлат раҳбари йиғилишда сўзлар экан, хорижий инвесторларга тенг ва адолатли шароит яратиш бўйича Ўзбекистон халқаро мажбуриятларни зиммасига олишда янги қадамлар ташлаётганини таъкидлади.

Президентнинг қайд этишича, Хорижий инвесторлар кенгаши сўнгги йилларда оддий маслаҳат механизми эмас, балки Янги Ўзбекистон билан жаҳон инвестиция ҳамжамияти ўртасидаги ишончли мулоқот ва амалий ислоҳотлар майдонига айланган.

Йиғилишда инвесторлар томонидан ўтган йил илгари сурилган 21 та ташаббус бўйича аниқ ечимлар қабул қилингани маълум қилинди. Давлат раҳбари инвесторларнинг таклифлари давлат сиёсатида ўзининг амалий ифодасини топаётганини таъкидлади.

Жумладан, Солиқ кодексига инвесторлар учун қулай ўзгартишлар киритилди, компаниялар ўртасидаги ички қарз битимлари молиявий назоратдан чиқарилди, асосий воситаларни тезлаштирилган тартибда амортизация қилиш ҳуқуқи берилди. Шунингдек, халқаро стандартлар асосида ҳисобот юритувчи хорижий компаниялар учун бир қатор мажбурий талаблар бекор қилинди.

Бундан ташқари, «Муқобил инвестиция жамғармалари тўғрисида»ги қонун лойиҳаси ишлаб чиқилди, масъулиятли бизнес юритиш стандартларини жорий этиш ҳамда 16 та техник регламентни халқаро меъёрларга мувофиқлаштириш дастури тайёрланди.

Маълумот учун, Хорижий инвесторлар кенгаши иштирокчилари сони ўтган бир йил давомида 54 тадан 85 тага етган. Бугун кенгаш таркибида иқтисодиётнинг 23 та тармоғини қамраб олган йирик халқаро компаниялар, шунингдек, Европа тикланиш ва тараққиёт банки, Осиё тараққиёт банки ҳамда Халқаро молия корпорацияси фаол иштирок этмоқда.