Миграция агентлиги Россиядаги мигрантларга 15 июнгача рўйхатдан ўтиш кераклигини эслатди

Россия ИИВ ва Ўзбекистоннинг дипломатик ваколатхоналари ҳамкорлигида РФ ҳудудида ҳуқуқий мақоми қонунийлаштирилиши керак бўлган 300 мингдан ортиқ Ўзбекистон фуқароларининг рўйхати шакллантирилди. Бу ҳақда Ташқи меҳнат миграцияси агентлиги маълум қилди.

Россия президентининг фармони асосида, чет эл фуқаролари 2021 йил 15 июнга қадар РФда бўлиб туриши мақомини қонунийлаштирилиши лозим.

«Шу фурсатдан фойдаланиб, Россия Федерацияси ҳудудида ноқонуний равишда бўлиб турган Ўзбекистон Республикаси фуқаролари 2021 йилнинг 15 июнига қадар яшаш жойидаги тегишли Россиянинг ички ишлар органларига мурожаат қилиш орқали Россия Федерацияси ҳудудида бўлишларини қонунийлаштириш ҳуқуқидан фойдаланишга чақирамиз.

Бунда Россиянинг ички ишлар органлари томонидан ноқонуний равишда бўлиб турган Ўзбекистон фуқароларига нисбатан мамлакатдан маъмурий чиқариб юбориш, депортация қилиш чоралари қўлланилмайди ҳамда уларга яшаш жойидаги миграция бўлимидан қайта рўйхатдан ўтиш имконияти берилади», – дейилади Миграция агентлиги 12 июнь куни тарқатган ахборотда.

Муҳлат тугаши арафасида Россиядаги миграция марказларида катта навбатлар юзага келган, бир неча кунлаб навбатда туриш ҳолатлари ҳам кузатилмоқда.

2020 йил апрелида РФ президенти Владимир Путин коронавирус хавфи туфайли чет эл фуқароларининг РФдаги ҳуқуқий мақомини белгилашга оид фармон имзолаган эди. Миграция агентлигига кўра, фармон қабул қилингач, 2020 йил давомида Россия ҳудудида вақтинча меҳнат фаолиятини амалга ошираётган 50 700 нафар Ўзбекистон фуқаросининг мақоми қонунийлаштирилган.

Агентликка кўра, РФда бўлиши мақомини қонунийлаштириш масаласида ёрдам олиш Москвадаги элчихона, Россия минтақаларидаги бош консулхоналар ва агентликка мурожаат қилиш мумкин. Тегишли телефон рақамлари Миграция агентлиги сайтининг ушбу саҳифасига жойланган.