Британияда локдаун енгиллаштирилиши 4 ҳафта кейинга қолдирилди

Британия ҳукумати коронавирус тарқалишига қарши киритилган чекловлар бекор қилинишини 4 ҳафта кейинга қолдирди. Бу ҳақда ҳукуматдаги манбаларга таяниб BBC News телеканали хабар берди.

Бунга сабаб сифатида мамлакатда коронавирусга чалинганлар сони кескин кўпайгани келтирилган.

Бунгача мамлакатда амал қилаётган локдаунни 21 июнда енгиллаштириш режалаштирилаётганди. Яқин орада Британия бош вазири Борис Жонсон чекловлар узайтирилишини тасдиқлаши кутилмоқда. Шундан кейин локдаун енгиллаштирилишининг кечроқ санага кўчирилиши парламент қуйи палатасида овозга қўйилади.

Британияда 13 июнда коронавирусдан 7490та янги касалланиш ва 8та ўлим ҳолати қайд этилди. Охирги ҳафта ичида касалланганлар сони ундан бир ҳафта олдингига қараганда 49 фоизга кўпайган. Британияда янги касалланиш ҳолатларининг 91 фоизи вируснинг ҳиндча штаммига тўғри келмоқда. 

Аввалроқ Жонсон ҳиндча штамм локдаунни енгиллаштиришга халақит қилиши мумкинлигини айтган. Кейинроқ у чекловларни енгиллаштиришда «эҳтиёткор бўлиш» кераклигини ва мамлакатда шифохонага ётқизилаётган беморлар кўпаяётганини таъкидлаб ўтган.

Айни вақтда Британиянинг 41 млндан кўпроқ аҳолиси коронавирусга қарши вакцинанинг бир дозасини, 30 млнга яқини эса икки дозасини олган.

Ҳукумат февралда вакцина татбиқи муваффақиятли давом эттирилиб, у беморлар орасида ўлим ҳолатларини сезиларли камайтирса ва шифохонага ётқизилиши керак бўлган беморлар сони кескин ошмасагина чекловлар бекор қилинишини айтган.