Эрон собиқ вице-президенти президентлик сайловидан ўз номзодини қайтариб олди

Эрон собиқ вице-президенти Муҳсин Меҳрализода 18 июн куни бўлиб ўтадиган президентлик сайловида номзод сифатида қатнашмасликка қарор қилди. Бу ҳақда IRNA агентлиги хабар берди.

 Хабарда айтилишича, у ўз қарори ҳақида Эрон ички ишлар вазирлигига ёзган мактубида маълум қилган. 

 Сайлов олдидан президентликка етти нафар номзод қайд этилганди: олий суд раиси Иброҳим Раисий, қабул қилинаётган қарорларнинг мақсадга мувофиқлиги бўйича кенгаш котиби Муҳсин Ризоий, марказий банк собиқ раҳбари Абдулносир Ҳимматий, миллий хавфсизлик олий кенгаши собиқ котиби Саид Жалилий, парламент раиси ўринбосари Амир Ҳусайн Қозизода Ҳошимий, парламент депутати Алиризо Заканий ва Меҳрализода.  

 Эронда сайлов кампанияси 16 июн куни якунига етади. 17 июн осойишталик куни деб эълон қилинган – номзодларга ташвиқот ишларини олиб бориш тақиқланади.

Президентлик сайлови 18 июн куни бўлиб ўтади.