“Ҳаётимнинг мазмуни – халқимизни рози қилиш” — президент Сергелидаги маҳалла аҳли билан учрашди

Маҳаллада амалга оширилган ободончилик ишлари билан танишган давлат раҳбари ҳудудда яшовчи фаоллар билан суҳбатлашди.

“Бир неча йил олдин Сергелида метро қурилади, мана шу чекка маҳаллалар ҳам обод бўлади дейилса, ҳеч ким ишонмасди. Тўғри, қийин бўлди, лекин ҳаракат қилдик ва мана натижасини кўрдик. Истагим шуки, ҳар бир маҳалла мана шундай обод, намунали бўлсин. Бунинг учун зарур маблағни ажратамиз, барча чораларни кўрамиз.

Менинг ҳаётим мазмуни – халқимизни, сиз азизларни рози қилиш”, – деди президент маҳалла аҳлига қарата.

Давлат раҳбари ёзги таътилда ёшларнинг бўш вақтини мазмунли ўтказиш кераклигини қайд этди.

“Жиноятчилик қаерда кўпаяди, ёшлар бўш, эътиборсиз қолган жойда кўпаяди. Шунинг учун ёшларнинг, айниқса уюшмаган ёшларимизнинг ҳар бир дақиқаси мазмунли ўтишига ҳаракат қилишимиз керак. Ёзги таътил пайтида ҳам мактабларда тўгараклар, турли дастурлар, маърифий учрашувларни ташкиллаштириш лозим”, – дея давлат раҳбарининг сўзларидан иқтибос келтирмоқда Kun.uz мухбири.