Бразилияда вакцина хариди бўйича мамлакат президентига қарши суриштирув ўтказилади

Бразилия олий суди Ҳиндистоннинг коронавирусга қарши Covaxin вакцинаси сотиб олиниши бўйича мамлакат президенти Жаир Болсонаруга қарши суриштирув бошланишини маъқуллади, деб хабар берди G1 портали.

Аввалроқ мамлакат бош прокуратураси суриштирув бошлаш учун сўров киритганди.

Ҳукумат вакцина жуда баланд нархда сотиб олинган деб тахмин қилмоқда.

Суриштирув бошлашга рухсат берган судья Роза Вебер президентнинг айбдорлиги тўғрисида фикр юритмасликка чақирди ва ҳукумат Болсонарунинг бу ишга алоқаси бор-йўқлигини аниқлашга уринаётганини айтди.

Ҳиндистон вакцинасини харид қилиш билан боғлиқ можаро Бразилия соғлиқни сақлаш вазирлиги ходимларидан бири ҳужжатларда қонунбузилишлар бўлишига қарамасдан, уни ҳинд вакцинасини сотиб олишга мажбурлашганини айтганидан сўнг бошланди. Ходим босим ҳақида президентга маълум қилган ва у чора кўришга ваъда берган.

G1 порталининг ёзишича, Covaxin вакцинаси Бразилия сотиб олаётган энг қиммат вакцина бўлган. Вакцинанинг бир дозаси нархи 80,7 реални (15,9 доллар) ташкил этган, бу AstraZeneca вакцинасидан тўрт баравар қиммат.

Бундан ташқари, Ҳиндистон томони дастлаб бир доза вакцинанинг нархини 1,34 доллар деб кўрсатган, аммо якунда шартномада 15 доллардан деб белгиланган. Шартнома умумий қиймати 1,6 млрд реалга (316,9 млн доллар) тенг бўлган.

Шартнома 97 кун ичида тузилган, Pfizer билан шартнома тузишга эса 330 кун керак бўлган, деб ёзади портал. 29 июн куни шартнома вақтинча тўхтатилган.