Испания Италиянинг ғалабали сериясига барҳам бера оладими? Яримфинал анонси

Ким қандай етиб келди?
Луис Энрике мураббийлигидаги Испания миллий жамоаси «E» гуруҳида Швеция (0:0), Польша (1:1) ва Словакия (5:0) билан ўйинларда 5 очко тўплаб, гуруҳдан 2-ўринни олган ҳолда плей-оффга йўлланма олди.

Қўшимча бўлимлар билан кечган нимчоракфиналда Хорватия устидан 5:3 ҳисобида зафар қучилган бўлса, чоракфиналда турнир кашфиёти Швейцария испанлар томонидан пенальтилар сериясида мағлуб этилди (1:1, 3:1). Яримфиналда эса «қизил фурия»ни Италия кутиб турибди.

Роберто Манчини бошқарувидаги Италия эса гуруҳ босқичидаёқ турнир фаворити эканлигини намойиш этди – Туркия (3:0) ва Швейцария (3:0) йирик, Уэльс эса минимал ҳисобда (1:0) мағлуб этилиб, 9 очко билан кейинги босқичга чиқилди.

1/8 финал босқичида Австрия қўшимча бўлимларда таслим этилди (2:1), чоракфиналда мусобақада чемпионликка даъвогар бўлган Бельгия тўхтатилди (2:1).

«Скуадра Адзурра»нинг рекордига барҳам бериладими?

Футболда тики-така услуби ўзининг авжига чиққан йилларда Испания Евро-2012 финалида Италияни йирик – 4:0 ҳисобида мағлуб этиб, қитъада тенгсиз эканлигини кўрсатганди. Ўшандан сўнг «мовий гвардия» Францияда ўтган 2016 йилги Европа чемпионати 1/8 финалида «қизил фурия»дан реванш олган – 2:0.

«Уэмбли»даги яримфинал тўқнашувидан олдин Италия миллий жамоасининг ғалабали серияси 13тани ташкил этмоқда, мағлубиятсиз серия эса 32 ўйинга етган. Пиреней яримороли вакиллари финал йўлланмасига эга чиқиш учун Апеннин яримороли вакилларининг рекордга айланган мағлубиятсиз сериясига барҳам беришига тўғри келади.

Рақам ва фактлар:

- Испания ва Италия ҳозиргача жами 37 марта ўзаро рўбарў келган. Кучлар тенг эканлиги кўринган – 11тадан ғалаба ва 15 ўйинда муроса кўчаси танланган.

- Испания ва Италия кетма-кет тўртинчи марта Европа чемпионатида ўзаро тўқнаш келишмоқда. Улар бунгача Евро-2008, Евро-2012 ва Евро-2016да ҳам ўзаро учрашган.

Тахминий таркиблар:

Италия: Доннарумма; Ди Лоренцо, Бонуччи, Кьеллини, Эмерсон; Барелла, Жоржиньо, Верратти; Кьеза, Иммобиле, Инсинье
Ўйнамайди: Спинаццола (жароҳат)

Испания: Унай Симон; Аспиликуэта, Эрик Гарсия, Ляпорт, Жорди Альба; Коке, Бускетс, Педри; Жерар Морено, Мората, Дани Ольмо
Сўроқ остида: Сарабия (жароҳат)

Ўйиндан олдин ким нималар деди?

Роберто Манчини (Италия бош мураббийи):

«Испаниянинг Бельгиядан фарқли жиҳати бўлса-да, ўйин жуда оғир кечишини тахмин қилиш қийин эмас. Бу баҳсдаги ўйинимиз аввалги учрашувдаги ҳаракатларимиздан катта фарқ қилади, аммо қийинчиликлар камайиб қолмайди. Испания узоқ вақт жаҳон футболида етакчилик қилди. Ҳозирда уларда авлодлар алмашинуви кузатилмоқда, жамоа нисбатан ёшарди. Шунга қарамай, испанлар таркибида кучли ижрочилар ва ажойиб мураббий бор».

Луис Энрике (Испания бош мураббийи):

«Икки жамоадан бири ўйинда яққол устунлик қилади, деб бўлмайди. Бу дуэлда ким ғолиб чиқишини томоша қилиш жуда қизиқ бўлади. Италияда юқори савияли футболчилар кўп, аммо уларнинг энг асосий устунлиги бу – ҳақиқий жамоа борлигидир. Бу рақиб ҳужумда ҳам, ҳимояда ҳам бутун жамоа бўлиб иштирок этади. Бу борада бизнинг услубимиз жуда ўхшаш. Манчини жамоасининг аввалги Италиядан фарқи шундаки, ҳозирги жамоа итальянларга хос бўлмаган жуда юқори прессингда ўйнайди. Бу рақибда кучли жиҳатлар кўпроқ. Финалга чиқиш учун икки жамоада ҳам яхши вазиятлар бўлиши аниқ».

Яримфинал ва финалларда «Уэмбли» 75 фоизга тўлади

Яримфинал ва финалга мезбонлик қиладиган «Уэмбли» стадиони 1/8 финал доирасидаги Италия – Австрия баҳсида 21 500 нафар томошабинни ўз бағрига олган бўлса, Англия – Германия учрашувида 80 минг сиғимга эга ўйингоҳнинг 50 фоизга тўлишига рухсат берилганди. Турнирнинг ҳал қилувчи сўнгги уч ўйинида эса стадион 75 фоизга тўлишига рухсат этилади.

6 июль (сешанба)

Евро-2020. Яримфинал.

Испания – Италия

Бош ҳакам: Феликс Брих (Германия)

Лондон, «Уэмбли» стадиони.

Ўйин бошланиш вақти: 23:59

ТВ-трансляция: UzReportTV.