Камчаткада йўловчи самолёт қулаб тушди. Бортдагиларнинг барчаси ҳалок бўлган

«Ҳозирда ноқулай об-ҳаво шароити ва ҳодиса жойига вертолётда етиб бориш қийинчиликлари туфайли қутқарув амалиётини тўхтатган. Иш эрта тонгдан давом эттирилади», дея маълум қилган Камчатка ўлкаси губернатори Владимир Солодов.

Росавиациянинг маълум қилишича, самолёт қолдиқлари қирғоқ учиш-қўниш йўлагидан тахминан 4-5 километр масофада жойлашган Палана посёлкаси ҳудудидан топилган. ФВВнинг аниқлик киритишича, қолдиқлар аэропортдан 3,8 километр масофада топилган.

Тахмин қилинишича, самолёт иккинчи айланага кираётганда қулаб тушган.

Санитария авиацияси қулаб тушган Ан-26 самолётининг барча йўловчилари ва экипаж аъзолари ҳалок бўлганини маълум қилган.

Росавиациядагилар ҳалокат жойида қутқарув ишларини олиб бориш ландшафтнинг ўзига хослиги туфайли мураккаблашганини билдирган. Қутқарувчилар воқеа жойига вездеходларда етиб бориши керак эди. Аммо қоронғи тушиши ва денгиз суви кўтарилиши туфайли уларнинг ҳаракатланиши қийинлашган.

Самолётга эгалик қилган компания вакиллари РИА Новости мухбирига маълум қилишича, Ан-26 «қирғоқдаги қояга урилиб кетган» ва унинг қолдиқларининг бир қисми денгизга тушган.

ОАВнинг эътибор қаратишича, ҳалокат ҳудудида ҳаво айниган ва кўриш даражаси паст бўлган. «Самолёт қўл режимида, учувчиларнинг қуруқлик билан алоқаси жуда паст даражада бўлган ҳолатда қўниш учун ҳаракат бошлаган. Тахмин қилинишича, кўриш даражаси паст бўлган ҳолатда самолёт биринчи уринишда қўна олмаган ва  тепалик билан тўқнашиб кетган», деган «Интерфакс» манбаси.

Камчатка ўлкаси губернатори Владимир Солодов агентлик билан интервьюсида самолёт экипажи тажрибали бўлганини ва авиаҳалокат сабаблари ҳақида гапиришда шошилмаслик кераклигини айтган. Солодовнинг сўзларига кўра, ҳозирча йўловчилар ва экипаж аъзоларининг жасадлари топилмаган: «У ерга фақат сув орқали катерлар билан бориш мумкин. Афтидан, фақат эртага қурбонлар бўйича расмий тасдиқлов бўлади».

Россия тергов қўмитаси (СКР) дастлабки версияларни келтирган - ноқулай об-ҳаво шароити, техник носозлик ва учувчи хатоси. 

Қўмита томонидан ҳаракат хавфсизлиги ва ҳаво транспорти эксплуатацияси қоидаларини бузиш бўйича жиноят иши қўзғатилди.

Петропавловск-Камчатский - Палана йўналишида учган Ан-26 билан алоқа сешанба тонгида узилиб қолганди. ФВВдагиларнинг маълумотига кўра, самолёт бортида экипаж аъзолари бўлган 6 киши ва 22 йўловчи бўлган. Йўловчилар орасида Палана посёлкаси раҳбари Ольга Мохирева ҳам бор эди.

Палана - шаҳарча типидаги посёлка бўлиб, Корякск округининг маъмурий марказидир (ўтмишда - Россиянинг алоҳида региони бўлган).

Йўқолиб қолган Ан-26 «Камчатка авиация корхонаси»га тегишли бўлган. Корхона бош директори Алексей Храбров «Интерфакс» билан суҳбатда, самолёт техник жиҳатдан соз ҳолатда бўлганини маълум қилган. ОАВ маълумотига кўра, самолёт 1982 йилдан буён фойдаланилиб келинган.

Россия ҳукумати матбуот хизмати хабар қилишича, Транспорт вазири Виталий Савельев ва Росавиация раҳбари Александр Нерадько қидирув ишларида қатнашиш учун Камчаткага учиб кетган.