Хитой Ерни «камикадзе» кемалар ёрдамида астероидлардан ҳимоя қилмоқчи

Хитой ҳукумати сайёрамиз учун таҳдид солувчи астероидни бартараф этиш учун коинот флотини ташкил этишини эълон қилди. SCMP’нинг хабар беришича, Хитой бу мақсадда Ерга хавф соладиган астероидлар орбиталарини ўзгартириш учун «Чанчжэн-5» ракеталари негизида ўнлаб ноядровий зарбдор воситаларни ишлаб чиқади.

 Аввалроқ АҚШнинг NASA коинот агентлиги HAMMER (Hypervelocity Asteroid Mitigation Mission for Emergency Response) деб номланган лойиҳани тақдим қилган. Лойиҳада хавфли астероидлар орбитасини ядро қуроли қўлламаган ҳолда ўзгартириш мумкинлиги айтилган. Бунинг учун кинетик энергияси астероид ҳаракатланиш траекториясини ўзгартира оладиган кўп сонда ракеталар қўлланади. Астероидга қарши ядро қуроли қўллаш эса Ер аҳолиси учун вазиятни янада мураккаблаштириши мумкин.

 Хитойнинг таъкидлашича, астероидлар орбитасини ўзгартириш бўйича ноядровий лойиҳани яқин 10 йил ичида якунлаш мумкин. Хитой бу мақсадда камикадзе-кемаларга эга 23та ракета ишлаб чиқади. Бундай флот ўз парвозидан 3 йил ўтиб астероид орбитасини хавфсиз орбитага ўзгартириши мумкин бўлади. Хитойлик тадқиқотчиларнинг таъкидлашича, бунинг учун ушбу флотга АҚШда мавжуд воситаларга қараганда 2 марта камроқ зарба кучи талаб этилади.