Навоий иссиқлик электр станциясини газ билан таъминлайдиган қувурда носозлик юзага келган. 1-сон буғ-газ қурилмаси вақтинчалик тўхтатилган. Бу ҳолат мамлакатнинг турли ҳудудларида электр энергияси таъминотида узилишларга сабаб бўлади. Бу ҳақда Энергетика вазирлиги матбуот хизмати хабар бермоқда.
Маълум қилинишича, бугун, 7 июль куни соат 05:48да Навоий иссиқлик электр станциясининг буғ-газ қурилмаларини табиий газ билан таъминловчи 2-тармоқ газ қувурида газ сизиб чиқиш ҳолати юзага келган. Ҳозирда мазкур носозликни бартараф этиш ишларини хавфсиз бажариш учун «Навоий-4» газ тақсимлаш станцияси орқали газ таъминоти тўхтатилмоқда.
Қайд этилишича, мазкур ишларни тўлиқ якунлаш жараёнида Навоий иссиқлик электр станциясининг 1-сон буғ-газ қурилмаси вақтинчалик тўхтатиб турилади. Шу сабабли мамлакатнинг айрим ҳудудларида электр энергияси таъминотида қисқа муддатли узилишлар кузатилиши мумкин.
Таъкидланишича, июль ойининг биринчи ярмида Ўзбекистон ҳудудида ҳаво ҳароратининг кескин кўтарилиши оқибатида 6-8 июль кунлари мамлакатнинг суткалик электр энергияси истеъмоли 223 миллион киловатт соатгача етиши кутилмоқда. Ушбу кўрсаткич ўтган мавсумнинг мос даврига нисбатан 23 фоизга кўп.
«Республикамиз сув омборларига сув келиш ҳажми ўтган йилнинг мос даврига нисбатан 37 фоизга кам ёки кўп йиллик ўртача сув келишининг 48 фоизини ташкил этмоқда. Бу ҳолат гидроэлектр станциялари ишлаб чиқариш кўрсаткичларининг пасайишига олиб келмоқда. Шунга қарамасдан, мамлакатимизда электр станциялар орқали режада кўрсатилган ҳажмларда электр энергияси ишлаб чиқариш чоралари кўрилмоқда», дейилади Энергетика вазирлиги матбуот хизмати тақдим этган маълумотда.
