Эрон президенти мамлакатда коронавируснинг бешинчи тўлқини бошланганини айтди

Апрел бошларида Эрон ҳукумати мамлакатда коронавируснинг тўртинчи тўлқини бошланганини маълум қилганди.

Фото: Iranian Presidency Office via AP

Эронда коронавирус билан боғлиқ вазият ёмонлашмоқда, касалликнинг бешинчи тўлқинига дуч келганлик эҳтимоли мавжуд, деди мамлакат президенти Ҳасан Руҳоний.

"Жанубий ва жануби-шарқий туманларда коронавируснинг "дельта" штамми тарқалиши ҳолатлари кузатилди. Мазкур штамм бошқа вилоятларга ҳам кириб келди ва вазият аввалги ҳафталарга нисбатан сезиларли даражада ёмонлашди", - деди у.

Руҳонийнинг таъкидлашича, мамлакатда кунига 500 минг фуқарони эмлаш имконияти борлигига қарамасдан, вирус тарқалишининг олдини олиш борасидаги тавсияларга риоя қилиш зарур.

"Эҳтимол, бешинчи тўлқин бошланиб бўлди", - деди Эрон президенти.

Апрел бошларида Эрон ҳукумати мамлакатда коронавируснинг тўртинчи тўлқини бошланганини маълум қилганди.

Эронда касаллик юқтирганлар сони 3,3 миллион нафарга етган, 85,6 минг бемор вафот этган.