Қашқадарёда бемордан 5 минг сўм сўрагани учун ишдан ҳайдалган шифокор қайта ишга тикланди

Қашқадарё вилояти Чироқчи туманида бемордан касаллик тарихи очиш учун 5 минг сўм сўрагани учун ишдан ҳайдалган шифокор ишга қайта тикланган.Бу ҳақда «Адолат» СДП Чироқчи тумани кенгаши раиси С.Ахмедов хабар бермоқда.

Маълум қилинишича, жорий йил 24 июнь куни Чироқчи туманида яшовчи фуқаро туман тиббиёт бирлашмаси юқумли касалликлар шифохонасига мурожаат қилган. Шифохона кундузги муолажа фельдшери Ғ.А. фуқародан касаллик тарихи дафтарини очиш учун 5 минг сўм сўраган. Ушбу хабар ижтимоий тармоқларда тарқалгандан сўнг, туман юқумли касалликлар шифохонаси раҳбарининг 2021 йил 1 июлдаги буйруғи билан муолажа фельдшери Ғ. А. ишдан бўшатилган ва у билан тузилган меҳнат шартномаси ҳам бекор қилинган.

Қайд этилишича, «Адолат» СДП вилоят ва туман Кенгаши депутатлари, фаоллар билан бўлиб ўтган нохуш ҳолат атрофлича ўрганилган. Туман юқумли касалликлар шифохонаси ходимлари фельдшер Ғ.А. намунали ходим бўлганини таъкидлашган. Шундан сўнг, Ғ.А.ни ўз ўрнига қайта тиклаш юзасидан мутасадди ташкилотларга тушунтириш ишлари олиб борилган.

Таъкидланишича, жорий йил 12 июль куни Чироқчи туман юқумли касалликлар шифохонаси бош шифокори С.Боймирзаевнинг буйруғи билан Ғ.А. ўз ўрнига ишга тикланган.