Армен Лашет матбуот анжуманида ўзини номуносиб тутганлиги учун танқид қилинди

Ушбу ҳолат видеоси Twitter ижтимоий тармоғида эълон қилингач, сиёсатчи ноўрин кулгуси учун танқид қилина бошланган.

Таъкидланишича, Лашет тошқинлардан энг кўп жабр кўрган федерал ерлардан бири - Шимолий Рейн-Вестфалия раҳбари ҳисобланади. 17 июлда Штайнмайер у ерга табиий офатнинг вайронкор оқибатларини муҳокама қилгани келган.

“Бу ҳолатдан тилим айланмай қолди”, деб ёзган Twitter’да Германия Социал-демократик партияси бош котиби Ларс Клингбайль Лашетнинг кулгусига изоҳ бериб. Бошқа сиёсатчилар Лашетдан дарҳол узр сўрашни талаб қилишган.

Ижтимоий тармоқлар фойдаланувчилари Христиан-демократик иттифоқ етакчисини танқид қилиб, #Laschetlacht (Лашет кулмоқда) хештегини ишга туширишган. Унга, шунингдек, ниқобсиз бўлгани ва ижтимоий масофага амал қилмагани эслатиб қўйилган. 

Кейинроқ сиёсатчининг ўзи ноўрин иши учун узр сўраган. У Twitter’да пост эълон қилиб, унда президентга ташрифи учун миннатдорлик билдирган ва ушбу ҳолатда ўзи ҳақида ёмон таассурот қолдирганидан афсусдалигини айтган.

Якунланаётган ҳафтада Германиянинг ғарбий ва жануби-ғарбий қисмларида кучли ёмғирлар ёғди. Бунинг оқибатида дарёлар ўзанидан чиқиб, тошқинларга ва кўплаб қурбонларга олиб келди. Шунингдек, мингдан ортиқ одам бедарак йўқолган.