«Валютадаги кредитларни фақат экспорт қилувчи тадбиркорлар олиши керак» — Сардор Умрзоқов

Ўзбекистон Президентининг тадбиркорлар билан бўладиган очиқ мулоқотига тайёргарлик кўриш доирасида тадбиркорлар мурожаатларини қабул қилиш ва таҳлил этиш бўйича Штаб фаолиятига бағишланган матбуот анжумани бўлиб ўтди.

Анжуманда инвестициялар ва ташқи савдо вазири Сардор Умрзоқов журналистлар томонидан берилган валютада банклардан маблағ жалб қилган тадбиркорлар ҳақидаги саволга жавоб берди.

«Валютадаги кредитларни биз фақат битта тоифага, фақат экспорт қилувчиларга беришимиз керак. Чунки уларда валютада тушум бор ва олган қарзини валютада яна ёпа олади. Агар тадбиркор ўз маҳсулотини фақат мамлакатнинг ичкарисига сотса, ўз айланма даромадини сўмда олса, унда сўмни валютага айлантираётган пайтда курс ўзгаришларини инобатга олсак, тадбиркор қийналиб қолади.

2017 йил 5 сентябрдаги ислоҳотлардан олдин, банкдан валютада кредит олган тадбиркорлар, курс ўзгаришлари ва рискка рози бўлиб, шартнома имзолаган. Курснинг ошиши оқибатида уларда турли муаммолар пайдо бўлди. Шу ўринда яна бир нарсани айтиб ўтиш жоиз, тадбиркорларимизда ҳам молиявий саводхонлик етишмаяпти. Шундай бўлса-да уларни қўлимиздан келганча қўллаб-қувватлашимиз керак. Бу бўйича ишчи гуруҳ тузганмиз ва муаммони ижобий ҳал қилиш бўйича таклифлар ҳам тайёрладик.

Шу сабаб тадбиркорлар банкдан валютада маблағ жалб қилаётганда, ҳамма томонларига эътибор бериши шарт. Пандемиядан кейинги даврда жаҳон иқтисодиётидаги вазият ўзгариши мумкин. Бу валюта курсига ҳам бевосита таъсир кўрсатади. Шунинг учун биз уларни келажакда рўй бериши мумкин бўлган хатарлардан суғурталашимиз керак», деди Сардор Умрзоқов.