Қашқадарёда 7 ойда лицензиясиз автотранспортда 2 мингдан зиёд йўловчи ташиган шахсга чора кўрилгани маълум қилинди

Қашқадарё вилоятида жорий йилнинг 7 ойи мобайнида лицензиясиз автоотранспортда қарийб 2917 нафар йўловчини ташиган шахсга чора кўрилган. Бу ҳақда вилоят транспорт бошқармаси хабар бермоқда.

Маълум қилинишича, жорий йилнинг ўтган 7 ойи мобайнида Қашқадарё вилояти бўйича бошқарма инспекторлари томонидан ЙПХ ходимлари билан ҳамкорликда 1000 дан зиёд рейд тадбирлари ўтказилган. Рейд тадбирлари давомида, лицензия олмасдан, ноқонуний тарзда йўловчи ташиш билан шуғулланган 2917 нафар ҳуқуқбузар аниқланган.

Қайд этилишича, аниқланган ҳар бир ҳолат бўйича ҳужжатлар тўпланиб, суд инстанцияларига чиқарилган ва 2 829 нафар шахсга суд тартибида чора кўрилган.

Кўрилган чора-тадбирлар натижасида, ўтган даврда 1 590 нафар транспорт воситаси эгаси ўз хатти-ҳаракати ноқонуний эканини англаб, лицензия варақаси олган ҳолда йўловчи ташиш хизмати кўрсата бошлаган. 1000 дан ортиқ ҳуқуқбузарга эса суд тартибида жарима тайинланиб, ҳозирга қадар 1 миллиард 567 миллион сўм ундирилган.

Эслатиб ўтамиз, президент қарори билан, 2022 йил 31 декабргача муддатга эксперимент тариқасида якка тартибдаги тадбиркорларга 4 та ўриндиқли енгил автотранспортда йўловчи ташиш фаолияти билан шуғулланиш ҳуқуқи берилди. Шу қарор асосида энди жисмоний шахслар якка тартибдаги тадбиркор сифатида рўйхатдан ўтиб, таксичилик фаолияти билан шуғулланишлари мумкин.