Тожикистонда тоғдаги туристларни қутқариш учун борган вертолёт ҳалокатга учради

Учувчи ҳалок бўлган, вертолёт бортидаги тўрт киши жароҳатланган.

Фото: Sputnik

Тожикистонда тоғда қолиб кетган россиялик туристларга ёрдам бериш учун йўл олган вертолёт ҳалокатга учради. Бу ҳақда РИА Новости хабар бермоқда.

Хабарда айтилишича, учувчи ҳалок бўлган, вертолёт бортидаги тўрт киши жароҳатланган.

Туристлар Поймозор дарасидаги музликни забт этиш учун кўтарилган бўлган.

«28 июлда олти минг метрдан юқори баландликда туристлардан бири кўчки остида қолган. Бошқалар бу ҳақда хабар берганидан сўнг улар билан алоқа узилиб қолган», – деган агентлик суҳбатдошларидан бири.

Унинг сўзларига кўра, вертолёт музликка қўниш чоғида ҳалокатга учраган.

Ҳалокат юз берган жойга қутқарувчилар йўл олган.