Пентагон матбуот котиби Жон Кирби Кобул аэропортини қўриқлаётган америкалик ҳарбийлар аэропорт олдида тўпланган афғонларнинг биридан гўдакни олиб кетганлари видеосига изоҳ берди. Гўдакнинг ҳарбийлар томонидан олиб кетилиши лавҳалари бутун дунё бўйлаб тарқалди.
Кирбининг таъкидлашича, бетоб бўлган болакайни ҳарбийларга унинг отаси берган. Болага тиббий ёрдам кўрсатилгач, у отасига қайтарилган. Кирби ҳарбийларнинг ушбу ишини “инсонпарварлик акти” деб атаган.
“Ота денгиз пиёда аскарларидан бетоб боласига ёрдам беришни илтимос қилган. Шунда девор устидаги ҳарбийлардан бири энгашиб, болани отасидан олган. Бола аэропорт ҳудудидаги норвег госпиталига олиб борилган. Госпиталда унга тиббий ёрдам кўрсатилган, сўнг отасига қайтарилган”, деб маълум қилган Пентагон вакили.
Айни вақтда Кобул аэропортига 6 мингга яқин америкалик ҳарбий ташланган. Улар америкаликлар, АҚШга ёрдам берган афғонлар ва учинчи давлатлар фуқароларининг Афғонистондан хавфсиз олиб чиқилишини таъминлашмоқда.
