Пентагон АҚШ ва Эрон ўртасидаги урушнинг нархини очиқлади

Эронга қарши ҳарбий операция аллақачон Америка бюджетига 29 миллиард долларга тушган. Бу ҳақда Конгрессдаги эшитувларда Мудофаа вазири ўринбосари ва Пентагон молия директори Жулс Ҳерст маълум қилди.

Унинг сўзларига кўра, бу маблағнинг қарийб 24 миллиард доллари бевосита қурол-яроғ ва жанговар ҳаракатларни таъминлашга, жумладан ўқ-дорилар, ракеталар, қурол-яроғ ва бошқа ҳарбий техникаларга сарфланган.

«Бирлашган штаб бошлиқлари қўмитаси жамоаси ва молия бошқармаси бу қийматни доимий равишда қайта кўриб чиқмоқда», деди Ҳерст.

Унинг аниқлик киритишича, янгиланган харажатларга техникани таъмирлаш ва алмаштириш, шунингдек, кампанияни олиб бориш билан боғлиқ операцион сарфлар ҳам киритилган.

Конгрессдаги эшитувлар АҚШ мудофаа вазири Пит Ҳегсет, Бирлашган штаб бошлиқлари қўмитаси раиси генерал Дэн Кейн ва Пентагоннинг бошқа вакиллари иштирокида бўлиб ўтди.

29 апрелда Пентагон уруш харажатларини 25 миллиард долларга баҳолаган эди. Шундай қилиб, икки ҳафтадан камроқ вақт ичида харажатлар яна 4 миллиард долларга ошди.

Бундан ташқари, апрель ойида Пентагон Эронга қарши ҳарбий операция бошланганидан бери йўқотишларни санаб ўтди. Пентагон маълумотларига кўра, Эронга қарши ҳарбий кампания давомида 365 нафар америкалик ҳарбий хизматчи яраланган ва 13 киши ҳалок бўлган. Ярадорлар орасида энг катта улушни қуруқликдаги қўшинлар (247 киши) ва флот (63 киши) ҳарбий хизматчилари ташкил этади. Шунингдек, 19 нафар денгиз пиёдаси ва 36 нафар АҚШ ҳарбий-ҳаво кучлари ходими яраланди.