Толиблар Афғонистонда мусиқа эшитишни тақиқлайди

“Толибон” исломий қонунларга таянган ҳолда замон билан ҳамнафас қадам ташлашга тайёр. Бу ҳақда ҳаракат вакили Забиҳулла Мужоҳид The New York Times газетасига берган интервьюсида айтди.

“Исломда мусиқа тақиқланган. Аммо одамларга босим ўтказмасдан уларни мусиқа эшитмасликка кўндира оламиз”, – деди у.

Мужоҳиднинг сўзларига кўра, толиблар “ўн йиллаб урушлардан вайрон бўлган мамлакатни тиклашга уринмоқда”.

“Биз келажак қуриш ва ўтмишни унутишни хоҳлаймиз”, – деди Мужоҳид.

У Афғонистондаги аёллар тақдири билан боғлиқ мавзуга ҳам тўхталиб ўтди. Мужоҳиднинг айтишича, келажакда аёллар ўзларининг кундалик юмушларига қайтишлари мумкин. Унинг сўзларига кўра, толиблар аёлларни уйда ўтиришга ва юзларини тўлиқ ёпиб юришга мажбурлашлари борасидаги хавотирлар асоссиз.

Мужоҳид аёлларнинг омма олдида эркак қариндош билан юриши тўғрисидаги талаб нотўғри талқин қилинганини айтди. Унинг маълум қилишича, бу талаб давомийлиги уч кун ва ундан ортиқ бўлган сафарларга тааллуқли.

“Агар улар мактаб, офис, университет ёки шифохонага борадиган бўлса, ёнида маҳрам бўлиши шарт эмас”, – деди у.