Жанубий Америкада жаҳон чемпионати учун саралаш босқичи доирасида ноодатий можаро юзага келди. Полиция Бразилия ва Аргентина ўртасидаги учрашув вақтида майдонга чиқиб келиб, меҳмон жамоа футболчиларини депорт қилишга уринди.
ЖЧ-2022 саралашининг навбатдаги турида Сан-Паулуда Бразилия ва Аргентина ўртасидаги ўйин 7-дақиқадаёқ тўхтатилди. Майдонга маҳаллий полициячилар ҳамда санитар хизмат ходимлари чиқиб келиб, ўйинни тўхтатишни талаб қилишди. Бир неча дақиқа давом этган музокаралардан сўнг Аргентина миллий жамоаси футболчилари ва мураббийлар штаби майдонни тарк этиб, кийим алмаштириш хонасига йўл олишди.
Гап шундаки, Аргентина жамоасининг бошланғич таркибда майдонга тушган уч футболчиси — дарвозабон Эмилиано Мартинес, ҳимоячи Кристиан Ромеро ва яримҳимоячи Жованни Ло Сельсо, шунингдек захирада қолган ҳавбек Эмилиано Буэндиа — Бразилияга кириш тартибини бузишгани маълум бўлган, мамлакатдаги ковид протоколга кўра улар шу куни майдонга чиқиши керак эмасди. Бу тўрт футболчи инглиз клублари сафида тўп суришади. АР хабарига кўра, Бразилия соғлиқни сақлаш вазирлиги томонидан ўрнатилган тартибга кўра, сўнгги икки ҳафта ичида Буюк Британияда бўлган барча шахслар Бразилияга келганидан кейин 14 кун давомида карантинда ўтириши талаб этилади. Маҳаллий амалдорлар Мартинес, Ромеро, Ло Сельсо ва Буэндиа бу қоидани бузган деб ҳисоблашди ва улар зудлик билан «келган жойига қайтиб кетиши кераклиги» билдирилди.
Шу билан бирга, бу тўрт футболчи Бразилияга киришда чегара назоратидан қандай ўтгани маълум эмас. Журналист Юнас Гиверанинг сўзларига кўра, улар мамлакатга киришда тўлдириладиган декларацияда сўнгги икки ҳафта ичида Буюк Британияда бўлмаганликларини кўрсатишган. Лекин уларнинг барчаси сўнгги дам олиш кунларида ўтказилган турда ўз клублари томонидан заявкага киритилганди. Яна бир версияга кўра эса улар ҳужжатларни қалбакилаштиришгани айтилади.
beIN журналисти Роберто Рохаснинг ёзишича, можаро бошланганида, аргентиналиклар сардори Лионель Месси майдонга тушиб келганлардан сўраган: «Биз уч кундан буён шу ердамиз, сиз бу ишни нега айнан ҳозир қилмоқдасиз?»
Аргентиналик футболчилар кийим алмаштириш хонасига қамалиб олишган ва ичкарига полициячилар киритилмаган. Кўп ўтмай автобус уларни стадион ҳудудидан олиб кетган.
Бу воқеалар фонида турли назариялар билдирилди: улардан бирига кўра, бразиллар қасддан можаро уюштиришган. Рақибдан фарқли ўлароқ, майдон эгалари бу ўйинга кучсизланган таркиб билан етиб келган. АПЛда тўп сурувчи футболчиларнинг кўпчилигини клублари қўйиб юбормаган: Алисон Бекер, Эдерсон, Тьяго Силва, Фред, Фабиньо, Роберто Фирмино, Габриэл Жезус, Ришарлисон. Шунингдек, Малком ва Клаудиньо ҳам Россияга учиб кетишган.
Ўйин бошланишига бир неча соат вақт қолганида Anvisa агентлиги (Бразилия соғлиқни назорат қилиш ташкилоти - назорат органи) баёнот билан чиқиб, Аргентина терма жамоасидаги тўрт футболчи мамлакатга кириш қоидаларини бузганини, улар изоляция қилиниши ва ўйинда иштирок этмаслиги кераклигини маълум қилди. Аммо КОНМЕБОЛ (Жанубий Америка футбол конфедерацияси) аргентиналиклар ковид протокол бўйича барча нормаларни бажаришганини, айнан шу туфайли ўйин бошланишига рухсат берилганини маълум қилди.
Аммо Anvisa’дагиларнинг фикри бошқачароқ эди ва улар қатъий ҳаракатларга ўтишди.
«Ҳакам қарорига кўра Бразилия ва Аргентина терма жамоалари ўртасидаги ўйин қолдирилди. Ҳакам ва комиссар ФИФА тартиб-интизом қўмитасига ҳисобот юборади ва шундан кейин тегишли чоралар кўрилади. Саралаш босқичи — ФИФА мусобақаси. Ташкилотчилик ва ривожлантириш бўйича барча қарорлар ушбу ташкилот томонидан чиқарилади», дейилган КОНМЕБОЛ баёнотида.
ФИФА ҳам қатъий ҳаракат қиладиган бўлса, Бразилияга техник мағлубият ёзилиши ҳеч гап эмас.
Айни вақтда саралаш босқичидаги вазият қуйидагича: Бразилия 21 очко билан биринчи ўринда, Аргентина 15 очко билан иккинчи ўринда жойлашган. Аргентиналиклар кейинги ўринлардаги Эквадорни уч, Уругвай ва Колумбияни олти очколик фарқ билан ортда қолдирмоқда. ЖЧ-2022га гуруҳ босқичида дастлабки тўрт ўринни эгаллаган жамоалар тўғридан тўғри йўлланма олади, бешинчи жамоа эса ўтиш ўйинларида иштирок этиши керак.
