Блинкен толибларга қарши қўшимча санкциялар киритилиши мумкинлигини истисно қилмади

Агар Афғонистон дунё ҳамжамияти кутаётган тарзда бошқарилмайдиган бўлса, "Толибон" қўшимча халқаро санкцияларга дуч келиши мумкин. Бу ҳақда АҚШ давлат департаменти раҳбари Энтони Блинкен маълум қилди.

"Толиблар афғонларнинг базавий ҳуқуқларини бузадиган бўлса, амалдаги санкциялар бекор қилинишини тасаввур қилиш қийин. Бундан ташқари, қўшимча санкциялар киритилиши мумкин", - деди у. 

Аввалроқ АҚШ ва бошқа қатор давлатлар толиблар санкциялар бекор қилинишини истаса, Афғонистонда инсон ҳуқуқларига риоя қилинишини кафолатлаши ва терроризмга қарши курашиши кераклигини билдирганди.

БМТ бош котиби Антониу Гутерриш ҳам БМТ Афғонистонда бутун афғон жамиятини ўз ичига олувчи инклюзив ҳукуматни кўришни исташини айтганди.

У толиблар ўзларининг жаҳон ҳамжамияти томонидан тан олинишларини, молиявий кўмак ҳамда санкциялар бекор қилинишини истаётганларини эслатиб ўтган.