Чехия ЕИни мамлакатдаги сайловолди кампаниясига аралашишда айблади

Чехия бош вазири Андрей Бабишнинг фикрича, Европарламент депутатлари Чехиянинг ички ишларига аралашиш мақсадида Европа комиссиясига босим ўтказмоқда.

Фото: Reuters

Европа иттифоқи ҳукумат органлари Чехия парламенти қуйи палатасига сайловлар олдидан сайловолди кампаниясига аралашмоқда. Бу ҳақда Чехия бош вазири Андрей Бабиш Parlamentnilisty нашрига берган интервьюсида айтди.

У Европарламент депутатларини Чехиянинг ички ишларига аралашиш мақсадида Европа комиссиясига босим ўтказаётганликда айблади.

«Бу уларнинг иши эмас. Биз озод ва суверен мамлакатмиз», — деб таъкидлади Бабиш.

Чехия бош вазири шунингдек, ЕК раиси ўринбосари, шаффофлик бўйича еврокомиссар Вера Йоуровани танқид қилди.

Бабишнинг сўзларига кўра, Венгрия ва Полша ҳам ЕИнинг ички сиёсатга босимини ҳис қилмоқда.