Коррупцияга қарши курашиш тизимини такомиллаштириш мақсадида 10та ҳужжатга ўзгартиришлар киритилмоқда

30 сентябрь куни бўлиб ўтган Сенат ялпи мажлисида «Ўзбекистон Республикасида коррупцияга қарши курашиш тизими такомиллаштирилиши муносабати билан Ўзбекистон Республикасининг айрим қонун ҳужжатларига ўзгартиш ва қўшимчалар киритиш тўғрисида»ги қонун сенаторлар томонидан маъқулланди.

Маълум қилинишича, ҳужжатга мувофиқ 9та қонунга: «Прокуратура тўғрисида»ги, «Ўзбекистон Республикаси Олий Мажлиси Қонунчилик палатасининг Регламенти тўғрисида»ги, «Ўзбекистон Республикаси Олий Мажлиси Сенатининг Регламенти тўғрисида»ги, «Бирлашган Миллатлар Ташкилотининг Коррупцияга қарши Конвенциясига (Нью-Йорк, 2003 йил 31 октябрь) Ўзбекистон Республикасининг қўшилиши тўғрисида»ги, «Жиноят ишини юритиш чоғида қамоқда сақлаш тўғрисида»ги, «Ҳуқуқбузарликлар профилактикаси тўғрисида»ги, «Парламент назорати тўғрисида»ги, «Коррупцияга қарши курашиш тўғрисида»ги, «Маъмурий қамоқни ўташ тартиби тўғрисида»ги қонунлар ҳамда Жиноят-ижроия кодексига ўзгартиш ва қўшимчалар киритилмоқда.

Қонун билан «2019-2020 йилларда коррупцияга қарши курашиш» Давлат дастурининг 25-бандида белгиланган вазифаларнинг тўлақонли амалга оширилишида зарур ҳуқуқий база мустаҳкамланиши кутилмоқда.

Қонун президент томонидан имзолангач, ҳужжатнинг ўзида белгиланган муддатда кучга киради.