Газ таъминоти ва кадастр тизимида коррупцион жиноятлар аниқланди

Давлат хавфсизлик хизмати ҳамда Иқтисодий жиноятларга қарши курашиш департаменти томонидан ўтказилган тезкор тадбирлар давомида Самарқанд ва Қашқадарё вилоятларида коррупция билан боғлиқ икки ҳолатга чек қўйилди.

Маълум қилинишича, Самарқанд вилоятидаги «Ургуттумангаз» газ таъминоти бўлимининг мансабдор ходими ҳамда ушбу ташкилотнинг собиқ ходими маҳаллий МЧЖга қарашли ишлаб чиқариш цехига янги табиий газ тақсимлаш ускунасини ўрнатиш учун лойиҳа ҳужжатларини расмийлаштириш ва техник шарт рухсатномасини олиб бериш эвазига 2 минг АҚШ доллари талаб қилган. Улар сўралган пул маблағини олган вақтда ашёвий далиллар билан ушланган.

Қашқадарё вилоятида эса Кадастр агентлигининг туман бўлими бошлиғи маҳаллий фуқарога иссиқхона қуриш учун ажратилган 50 сотих суғориладиган ер майдонини бошқа шахс номига расмийлаштириб беришни ваъда қилиб, бунинг учун муқаддам 11 600 АҚШ доллари олгани аниқланган.

Терговга қадар текширувда мансабдор шахс олган маблағининг бир қисмини — 49,7 млн сўмни қайтариб берган вақтида унинг ноқонуний ҳаракатлари фош этилган. Кейинчалик қолган 89,5 млн сўм ҳам жабрланувчига қайтарилган.

Ҳозирда ҳар икки ҳолат юзасидан жиноят ишлари қўзғатилиб, тергов ҳаракатлари давом этмоқда.

ДХХ фуқароларга мурожаат қилиб, кундалик ҳаётда коррупция ва бошқа қонунбузилиш ҳолатларига дуч келганда, идоранing 1520 қисқа рақамига қўнғироқ қилиб хабар беришни сўради. Қайд этилишича, мурожаат этувчиларнинг шахси сир сақланиши кафолатланади.